15 снежня стартуе адкрыты конкурс на распрацоўку новага лагатыпа асацыяцыі «Федэрацыя хакея Рэспублікі Беларусь», паведаміў на пасяджэнні выканкама асацыяцыі 12 снежня ў Мінску генеральны сакратар арганізацыі Яраслаў Заўгародні.
Ён адзначыў, што з часу правядзення чэмпіянату свету па хакеі — 2014 у Мінску федэрацыя «пачала працу ў кірунку развіцця маркетынгу». Для гэтага «быў сфарміраваны новы аддзел», і маркетынг у федэрацыі ператварыўся ў «адзін з прыярытэтных кірункаў».
Цяперашні лагатып выкананы ў колерах дзяржаўнага сцяга і абыгрывае абрэвіятуру федэрацыі. Генеральны сакратар выканкама ФХРБ канстатаваў, што лагатып «не відазмяняўся 23 гады», таму патрабуе абнаўлення.
Паводле слоў Заўгародняга, на правядзенне адкрытага конкурсу адводзіцца адзін месяц. Ён не выключыў, што федэрацыя можа самастойна ўдасканаліць той варыянт, які будзе названы пераможцам па выніках конкурсу. Для ўдзелу ў конкурсе плануецца звярнуцца да прафесіяналаў у галіне дызайну.
Новы лагатып на зацвярджэнне выканкама ФХРБ прадставяць у канцы студзеня 2015 года.
Пасля гэтага федэрацыя мае намер змяніць свой карпаратыўны стыль, а таксама пачне распрацоўку новай афіцыйнай сувенірнай прадукцыі.
На афіцыйным мерапрыемстве былі вырашаны некаторыя арганізацыйныя пытанні. У прыватнасці, Уладзімір Праскураў зацверджаны ў якасці старшыні судзейскага камітэта. Члены выканкама федэрацыі зацвердзілі склад судзейскага і дысцыплінарнага камітэтаў, а таксама дакументы, якія рэгламентуюць іх дзейнасць. Акрамя гэтага, зацверджана палажэнне аб спонсарах і партнёрах ФХРБ, а таксама прыняты нормы аплаты суддзяў на міжнародныя матчы.
Цяпер чытаюць
Музыка Цім Суладзэ: Розніца 30 гадоў — тое, што адпавядае маім уяўленням пра адносіны26
Каментары