Петрыкаўскі школьнік у заклад залез на слуп лініі электраперадач і загінуў
У Петрыкаве высвятляюць абставіны гібелі падлетка. Паводле папярэдняй інфармацыі, учора ўвечары 14-гадовы школьнік забраўся на металічную апору высакавольтнай лініі і быў забіты токам. Мясцовыя жыхары мяркуюць, што, магчыма, хлопец падняўся туды ў заклад.
Здарылася гэта каля 20:00 на тэрыторыі былога камбіната будматэрыялаў. Непадалёк, за сотню метраў, якраз знаходзілася ў альтанцы кампанія падлеткаў — яны першымі і заўважылі нядобрае. Пабеглі да месца здарэння, па шляху выклікалі хуткую.
— Мы пачулі спецыфічны гук такі, убачылі ўспышкі, яны секунд пяць доўжыліся, — распавяла Onliner.by Ксенія, адна з дзяўчынак, якія сталі сведкамі здарэння. — Хлопчыка гэтага стала трэсці, потым ён паляцеў уніз, там метраў 10 вышыня была, яго яшчэ падкідвала. Не, агароджы там няма… Мы падбеглі, ён на зямлі ляжыць. Побач яшчэ быццам бы чацвёра хлопцаў, якія з ім былі, двое потым сышлі. Яны папрасілі нас патэлефанаваць бацькам гэтага хлопчыка, мы патэлефанавалі. Міліцыя і хуткая прыехалі, медыкі сказалі, што «ўжо ўсё». Потым мы пайшлі.
Падлетак вучыўся ў мясцовым інтэрнаце, сябры, якія знаходзіліся з ім, — петрыкаўскія школьнікі. Нібыта на вышку палезлі ўдваіх — адзін, узлезшы метраў на пяць, вырашыў спусціцца, другі стаў караскацца вышэй.
У Следчым камітэце распавялі Onliner.by, што цела падлетка знаходзілася за метр ад мачты. Праводзіцца даследчая праверка па факце яго гібелі. Прызначаны шэраг даследаванняў, якія павінны вызначыць прычыну смерці. Пакуль у якасці асноўнай версіі разглядаецца паражэнне электрычным токам.
Цяпер чытаюць
Палітолаг Аліна Харысава пагадзілася супрацоўнічаць з СБУ. Аказалася, гэта было КДБ36
Каментары