«Памяркоўныя» беларусы дагэтуль збольшага прызвычаіліся прымяншаць свае заслугі. Не напоўніліся вуліцы Мінска шчаслівымі тварамі са сцягамі ані, прыкладам, пасля трэцяй перамогі Дар’і Домрачавай на Алімпіядзе ў Сочы, ані пасля перамогі БАТЭ над грознай «Баварыяй». Відаць, у сэрцах і галовах грамадзян маладой беларускай дзяржавы ўсё яшчэ даспявае паўнавартаснае пачуцце самапавагі.
Мы ж уважліва прасачылі за поспехамі беларусаў у першым месяцы 2017-га ў самых розных сферах. Падставаў грымнуць на ўвесь свет не было, але каб дзесьці дадаць «я таксама з Беларусі» — удосталь.
Беларуская аплікацыя для сэлфі Fabby атрымала інвестыцый на суму $2 млн
Летась толькі лянотнік не пісаў пра поспех беларускіх распрацоўшчыкаў дадатку MSQRD, які ўрэшце выкупіў Facebook Марка Цукерберга. Гэты ж год пачынаецца з навіны пра інвестыцыі ў 2 млн даляраў у новы праект сузаснавальніка Maps.me Юрыя Мельнічка — мабільны дадатак Fabby, які дазваляе мяняць фон сэлфі.
Беларускі праект трапіў у топ-10 новых гаджэтаў ад USA Today
Па выніках выставы Consumer Electronics Show, што праходзіла ў Лас-Вегасе, аўтарытэтнае выданне USA Today апублікавала ўласны топ-10 новых гаджэтаў. У прэстыжны спіс трапіў і беларускі праект Kino-mo Hypervsn па распрацоўцы галаграфічных экранаў.
Упершыню ў гісторыі «Дакара» беларусы сталі шостымі ў самай цяжкай гонцы
Беларускія гоншчыкі паказалі на ралі-рэйдзе «Дакар-2017» найлепшы вынік за ўсю гісторыю сваіх выступаў. «На сёння МАЗ — адзін з найлепшых аўтамабіляў у свеце. Канкурэнцыю нам складаюць толькі КамАЗ і Iveco. Можна сказаць, што мы прабіліся ў эліту сусветнага аўтаспорту», — падсумаваў вынікі гонкі пілот і кіраўнік каманды «МАЗ-СПОРТаўта» Сяргей Вязовіч.
Фотапраект мінчанкі трапіў на старонкі італьянскага Vogue
Сусветнавядомы часопіс пра моду для жанчын з больш чым са стагадовай гісторыяй змясціў на сваіх старонках у сеціве свежы фотапраект беларускі Таццяны Кежа Static Rush. І гэта не першае з’яўленне нестандартных здымкаў мінчанкі ў папулярным глянцы.
Беларусь упершыню ў гісторыі перамагла Венгрыю і выйшла ў плэй-оф чэмпіянату свету па гандболе
І неістотна, што адбылося пасля. У той вечар спартыўныя форумы стракацелі шчаслівымі каментарамі-віншаваннямі: згаладаўся беларускі заўзятар на перамогі ў гульнявых відах спорту на найвышэйшым узроўні. Для маладой каманды Юрыя Шаўцова 1/8 фінала пакуль аказалася столлю.
Беларускія астраномы трапілі ў кембрыджскі падручнік
Беларускія астраномы публікуюць фотаздымкі Месяца ў саліднай кнізе Shoot The Moon брытанскага ўніверсітэта.
Жаночая зборная Беларусі (U-21) па індархакеі стала срэбраным прызёрам ЧЕ
Індархакей — частка неалімпійскай праграмы, кшталту хакею на траве, толькі ў закрытых памяшканнях. Беларускія юніёркі на чэмпіянаце Еўропы па гэтым відзе спорту ў Вене саступілі чэшскім аднагодкам толькі ў фінале, і толькі ў серыі штрафных кідкоў.
Антон Кушнір перамог на этапе Кубка свету па лыжнай акрабатыцы ў ЗША
Цудоўны камбэк выдаў алімпійскі чэмпіён Сочы Антон Кушнір. Пасля трохгадовай паўзы ў спаборніцтвах фрыстайліст ізноў узяўся штампаваць перамогі. Месяц таму Кушніру не было роўных у кітайскім Бэйда-Лэйк, а цяпер 32-гадовы спартовец файна выступіў у амерыканскім Лэйк-Плэсідзе.
«Наша Нiва» — бастыён беларушчыны
ПАДТРЫМАЦЬ
Палітолаг Аліна Харысава пагадзілася супрацоўнічаць з СБУ. Аказалася, гэта было КДБ36
Каментары