Беларусы стварылі дадатак, які папярэджвае пра шкоднасць прадуктаў
Распрацоўшчыкі з менскай студыі hyper owl стварылі мабільны дадатак howl, які дапамагае разабрацца ў складзе прадуктаў. Сэрвіс даступны для загрузкі ў Google Play і AppStore.
Дадатак скануе штрых-код на ўпакоўцы тавару і паказвае інфармацыю аб яго складзе. Асобна сэрвіс вылучае некаторыя ўласцівасці інгрэдыентаў, напрыклад, паведамляе, што прадукт «утрымлівае танны заменнік бялку», «спрыяе пераяданню» або «забаронены ў іншых краінах».
«Дадатак глядзіць на прадукт таксама, як і звычайны пакупнік. Мы не праводзім экспертызы тавараў, бо сканцэнтраваны на тым, каб пакрыць максімальны асартымент, — тлумачаць распрацоўшчыкі. — Мы бяром інфармацыю з этыкеткі прадукту або з іншых агульнадаступных крыніц».
На аснове складу сэрвіс разлічвае «Індэкс прыязнасці» па 100-бальнай шкале. 40 балаў атрымлівае прадукт, які адпавядае ўсім дзяржаўным патрабаванням бяспекі. На 100 ацэньваюць той, які адпавядае яшчэ больш строгім патрабаванням. Сярод іх — «добра збалансаваны», «не спрыяе пераяданню», «не ўтрымлівае танных заменнікаў», а таксама мноства іншых.
«Ацэнка суб'ектыўная. У прынцыпе не існуе ніякай агульнапрынятай методыкі ацэнкі. Таму прыйшлося вышукваць нейкія хакі, вычытваць інфармацыю аб тым, на што могуць пайсці вытворцы, і самастойна ранжыраваць», — распавядае аўтар ідэі Аляксей Козел.
Аб кожным з «непрыязных» кампанентаў сэрвіс дае падрабязную інфармацыю і разлічвае максімальную рэкамендаваную порцыю на аснове полу карыстальніка. Для гэтага распрацоўшчыкі кансультаваліся з некалькімі спецыялістамі па харчаванні, сярод іх быў доктар, кандыдат медыцынскіх навук Андрэй Белавешкін. Ён дапамог зрабіць разлік рэкамендаванай порцыі.
Таксама распрацоўшчыкі бралі да ўвагі тое, для чаго выкарыстоўваецца заменнік: ён робіць больш таннай вытворчасць ці дазваляе кампенсаваць недахопы сыравіны.
Праўда, нават калі ў прадукту ацэнка не максімальная — гэта не сведчыць пра яго шкоду. «Калі прадукт дапушчаны на паліцы, то ён з'яўляецца бяспечным, гэта значыць не можа выклікаць значных праблем са здароўем, — тлумачыць Аляксей. — Але калі склады прадуктаў адрозніваюцца, хочацца разумець, чаму так адбываецца».
Яшчэ адна опцыя дадатка — інфармацыя пра зніжкі на тыя ці іншыя тавары. «У раздзеле сканавання карыстальнік дазнаецца цікавую інфармацыю аб прадукце. У адказ ён можа паставіць звыклы лайк або дызлайк тавару. Пры наступным абнаўленні каталога мы ўлічым вашыя перавагі і пабудуем стужку спецыяльна для вас», — абяцаюць стваральнікі сэрвісу.
Зараз у дадатку ёсць інфармацыя прыкладна аб 50 тысячах прадуктаў, якія прадаюцца ў Беларусі. У будучым распрацоўшчыкі абяцаюць пашыраць і абнаўляць базу.
У гадавіну смерці Жанны Фрыске Дзмітрый Шэпелеў распавёў, чаму не дазваляе сыну бачыцца з яе сваякамі16
Каментары