Biełarusy stvaryli dadatak, jaki papiaredžvaje pra škodnaść praduktaŭ
Raspracoŭščyki ź mienskaj studyi hyper owl stvaryli mabilny dadatak howl, jaki dapamahaje razabracca ŭ składzie praduktaŭ. Servis dastupny dla zahruzki ŭ Google Play i AppStore.
Dadatak skanuje štrych-kod na ŭpakoŭcy tavaru i pakazvaje infarmacyju ab jaho składzie. Asobna servis vyłučaje niekatoryja ŭłaścivaści inhredyjentaŭ, naprykład, paviedamlaje, što pradukt «utrymlivaje tanny zamieńnik białku», «spryjaje pierajadańniu» abo «zabaronieny ŭ inšych krainach».
«Dadatak hladzić na pradukt taksama, jak i zvyčajny pakupnik. My nie pravodzim ekśpiertyzy tavaraŭ, bo skancentravany na tym, kab pakryć maksimalny asartymient, — tłumačać raspracoŭščyki. — My biarom infarmacyju z etykietki praduktu abo ź inšych ahulnadastupnych krynic».
Na asnovie składu servis raźličvaje «Indeks pryjaznaści» pa 100-balnaj škale. 40 bałaŭ atrymlivaje pradukt, jaki adpaviadaje ŭsim dziaržaŭnym patrabavańniam biaśpieki. Na 100 aceńvajuć toj, jaki adpaviadaje jašče bolš strohim patrabavańniam. Siarod ich — «dobra zbałansavany», «nie spryjaje pierajadańniu», «nie ŭtrymlivaje tannych zamieńnikaŭ», a taksama mnostva inšych.
«Acenka subjektyŭnaja. U pryncypie nie isnuje nijakaj ahulnapryniataj mietodyki acenki. Tamu pryjšłosia vyšukvać niejkija chaki, vyčytvać infarmacyju ab tym, na što mohuć pajści vytvorcy, i samastojna ranžyravać», — raspaviadaje aŭtar idei Alaksiej Kozieł.
Ab kožnym z «niepryjaznych» kampanientaŭ servis daje padrabiaznuju infarmacyju i raźličvaje maksimalnuju rekamiendavanuju porcyju na asnovie połu karystalnika. Dla hetaha raspracoŭščyki kansultavalisia ź niekalkimi śpiecyjalistami pa charčavańni, siarod ich byŭ doktar, kandydat miedycynskich navuk Andrej Biełavieškin. Jon dapamoh zrabić raźlik rekamiendavanaj porcyi.
Taksama raspracoŭščyki brali da ŭvahi toje, dla čaho vykarystoŭvajecca zamieńnik: jon robić bolš tannaj vytvorčaść ci dazvalaje kampiensavać niedachopy syraviny.
Praŭda, navat kali ŭ praduktu acenka nie maksimalnaja — heta nie śviedčyć pra jaho škodu. «Kali pradukt dapuščany na palicy, to jon źjaŭlajecca biaśpiečnym, heta značyć nie moža vyklikać značnych prablem sa zdaroŭjem, — tłumačyć Alaksiej. — Ale kali składy praduktaŭ adroźnivajucca, chočacca razumieć, čamu tak adbyvajecca».
Jašče adna opcyja dadatka — infarmacyja pra źnižki na tyja ci inšyja tavary. «U raździele skanavańnia karystalnik daznajecca cikavuju infarmacyju ab pradukcie. U adkaz jon moža pastavić zvykły łajk abo dyzłajk tavaru. Pry nastupnym abnaŭleńni katałoha my ŭličym vašyja pieravahi i pabudujem stužku śpiecyjalna dla vas», — abiacajuć stvaralniki servisu.
Zaraz u dadatku jość infarmacyja prykładna ab 50 tysiačach praduktaŭ, jakija pradajucca ŭ Biełarusi. U budučym raspracoŭščyki abiacajuć pašyrać i abnaŭlać bazu.
Kamientary