Зноў сэксізм! Інтэрнаўтаў абурыла рэклама IKEA пра незамужніх жанчын
Карыстальнікі сацсетак назвалі сэксісцкім рэкламны ролік мэблевай кампаніі IKEA, які выйшаў нядаўна на кітайскім тэлебачанні. Пра медыяскандал піша ВВС.
«Не называй мяне мамай, калі не можаш прывесці дадому хлопца», — кажа ў рэкламе маладой незамужняй кітаянцы маці падчас сямейнай вячэры. Далей на парозе кватэры з'яўляецца малады чалавек з букетам, а бацькі дзяўчыны радасна пачынаюць упрыгожваць гасціную пры дапамозе элементаў дэкору ад IKEA.
Рэклама выклікала вельмі негатыўную рэакцыю ў сацсетках, яе назвалі сэксісцкай і шкоднай. Карыстальнікі адзначалі, што ў роліку высмейваюцца адзінокія жанчыны, а таксама абясцэньваецца асоба жанчыны толькі таму, што ў яе няма бойфрэнда. Пасля гэтага мэблевая кампанія вымушаная была папрасіць прабачэння перад аўдыторыяй і паведаміць, што прыбярэ дадзены ролік з эфіру.
У заяве сказана, што кампанія прыносіць свае прабачэнні за тое, што «стварыла няправільны вобраз». «Гэтая рэклама павінна была паказаць, як лёгка тавары з IKEA дапамагаюць ператварыць звычайнае жыллё ў месца для свята. Мы хацелі заклікаць нашых пакупнікоў адзначаць любы момант жыцця», — гаворыцца ў пасце. Акрамя таго, у сваёй заяве кампанія падкрэслівае, што падтрымлівае любы стыль жыцця і што раўнапраўе полаў — адна з ключавых каштоўнасцяў карпаратыўнай культуры IKEA.
У апошні час у Кітаі дастаткова сур'ёзна абмяркоўваецца праблема дзяўчат старэйшых за 27 гадоў, якія не знаходзяцца ў адносінах. На такіх дзяўчат у грамадстве аказваецца ціск, іх называюць sheng nu, то бок «незапатрабаванымі» або «аб'едкамі». Сюжэт падобнага ціску і лёг у аснову новай рэкламы IKEA, аднак яе стваральнікі не прынялі пад увагу, што выкарыстоўваюць для прыцягнення ўвагі вельмі негатыўнае клішэ.
У адным з гнеўных каментароў у кітайскай сацыяльнай сетцы Weibo гаворыцца: «Дыскрымінацыя адзіночак і адзінокіх жанчын. Няма бойфрэнда — і твая ўласная сям'я пагарджае табой. Што за каштоўнасці вы распаўсюджваеце?» Іншы каментатар працягвае: «Як міжнародная кампанія IKEA павінна трансляваць самыя прагрэсіўныя ідэі, якія існуюць у свеце, і несці іх у Кітай. Замест гэтага яна пераймае ў Кітаі дрэннае і транслюе гэта на ўвесь свет».
Цяпер чытаюць
Што вядома пра жанчыну, якая загінула ў аўтобусе, што вёз беларускіх футбалістаў-школьнікаў у Геленджык?21
Каментары