Рэктарам МІТСО замест контрразвездчыка Князева стаў пракурор Пазняк
У канцы жніўня змяніўся рэктар у Міжнародным МІТСО. У савецкі час гэта была прафсаюзная ВНУ. З развалам СССР змяніла назву, цяперашняе найменне МІТСО набыло ў 2011 годзе, а расшыфроўваецца абрэвіятура, як Міжнародны інстытут працоўных і сацыяльных адносін.
Апошнія сем гадоў рэктарам установы быў Станіслаў Князеў. Ураджэнец Новасібірска, выпускнік Вышэйшай школы КГБ. Ён узначальваў вайсковую контрразведку КДБ Беларусі ў пачатку 1990-х. У 2001 стаў намеснікам дзяржсакратара Рады бяспекі, праз месяц прызначаны намеснікам кіраўніка Адміністрацыі прэзідэнта (замест Замяталіна). У 2003 стаў рэктарам Акадэміі кіравання. Князеву 69 гадоў.
Новым рэктарам стаў Вадзім Пазняк, яму 42 гады. Апошнія пару гадоў ён з’яўляўся намеснікам рэктара ў Акадэміі кіравання па адміністрацыйна-гаспадарчай працы.
«Вядзе пытанні адміністрацыйна-гаспадарчага аддзела, аддзела капітальнага будаўніцтва, аддзела матэрыяльна-тэхнічнага забеспячэння, рэдакцыйна-выдавецкага цэнтра, жыллёвага комплексу, спартыўнага комплексу, цэнтра «Гандлёвы комплекс Акадэміі кіравання пры Прэзідэнце Рэспублікі Беларусь», службы аховы, бюро аховы працы, здраўпункта», — было напісана пра яго на сайце.
У Акадэмію кіравання Вадзім Пазняк трапіў з Генеральнай пракуратуры, дзе быў старшым пракурорам аддзела па нагляду за выкананнем заканадаўства аб непаўналетніх і моладзі.
У бытнасць працы пракурорам Вадзім Пазняк запляміў сябе судом над Паўлам Севярынцам і Міколам Статкевічам, якіх судзілі за шэсце па праспекце пасля рэфэрэндуму 2004 года. Ён прасіў асудзіць апазіцыянераў на 3 гады «хіміі», суддзя задаволіў такое прашэнне.
У 2005 Пазняк быў пракурорам на палітычным працэсе над Андрэем Клімавым за арганізацыю Дня Волі. Пазняк прасіў тры гады калоніі, суд даў палітыку 1,5 года «хіміі».
Намеснікам рэктара ў МІТСО з’яўляецца былы міністр абароны Леанід Мальцаў. Станіслаў Князеў стаў ганаровым рэктарам ВНУ.
Цяпер чытаюць
Героя тэлефонных зліваў палкоўніка Кісяля, які заклікаў калечыць дэманстрантаў, раптоўна апусцілі на раённы ўзровень9
Каментары