Пра гэта Аляксандр Лукашэнка заявіў сёння ў час наведвання Добрушскай папяровай фабрыкі «Герой працы», перадае БЕЛТА.
Кіраўнік дзяржавы ў Добрушы азнаёміўся, як прасоўваецца будаўніцтва завода па выпуску крэйдаваных і некрэйдаваных відаў кардона, які павінны былі ўвесці ў эксплуатацыю яшчэ ў 2015 годзе, але аб'ект закансерваваны.
«На сённяшні дзень у чым праблема? Што засталося?» — спытаў Аляксандр Лукашэнка.
Старшыня канцэрна «Беллеспаперапрам» Юрый Назараў распавёў, што завод гатовы на 90%. Засталося запусціць машыннае абсталяванне і завяршыць невялікія будаўнічыя работы.
«А навошта столькі грошай для гэтага (каля $ 83 млн), калі ўсё ёсць?» — удакладніў Лукашэнка.
Як паведамілі кіраўніку дзяржавы, палова гэтых сродкаў будзе выплачана аўстрыйскай кампаніі Andritz, якая зоймецца запускам машын. Беларускія прадпрыемствы не могуць самі зрабіць гэта, паколькі ў іх няма такіх кампетэнцый: такой вытворчасці раней не было на ўсёй постсавецкай прасторы. «Аўстрыйская кампанія — лідар у гэтай сферы. Яны гарантуюць, што мы атрымаем тое, дзеля чаго будуем завод», — адзначыў Юрый Назараў.
Аўстрыйцы ў выпадку патрэбы дапаставяць у Добруш тэхніку. У перспектыве наладзіць вытворчасць гэтых вузлоў можна і ў Беларусі.
«Усё гэта мы павінны вырабляць у сябе, калі нам спатрэбіцца. У нас няма нафты, як у Расіі. Яны могуць купіць любыя запчасткі: ім не шкада валюты. Нам трэба валюту зарабляць, таму пажадана не вывозіць яе, — падкрэсліў Аляксандр Лукашэнка. — За імпартазамяшчэнне мы возьмемся сур'ёзна. Гэта ж не справа».
Каментары