12 верасня ў Мінску ў межах свята горада адбудзецца адкрыццё гарналыжнага цэнтра.
Як паведаміў на прэс‑канферэнцыі 27 жніўня начальнік упраўлення фізкультуры, спорту і турызму Мінгарвыканкама Міхаіл Юспа, праграма і час адкрыцця пакуль удакладняюцца.
Цэнтр размяшчаецца ў мікрараёне Курасоўшчына (вуліца Казінца) і складаецца з гор вышынёй 100 і 80 метраў, а таксама пакатага спуску для дзяцей і навічкоў. Будзе адкрыты і спецыяльны гарналыжны атракцыён.
Плануецца, што новы цэнтр будзе працаваць круглы год. «Цяпер аматары гарналыжнага спорту змогуць займацца, не выязджаючы ў Лагойск або Сілічы», — адзначыў Юспа.
У спартыўнай святочнай праграме ёсць і іншыя мерапрыемствы. Так, 5 верасня на полі аэрапорта Мінск‑1 пройдуць спаборніцтвы па экстрэмальным ваджэнні аўтамабіляў і парад рэтрааўтамабіляў, 9 верасня на стадыёне «Дынама» — адборачны матч чэмпіянату свету па футболе паміж зборнымі Беларусі і Украіны, 9—11 верасня ў Палацы спорту — турнір па спартыўнай гімнастыцы. 12 верасня ў Палацы спорту адбудуцца спаборніцтвы па тайскім боксе, на 27‑м кіламетры веладарожкі ўздоўж ракі Свіслач — Мінскі міжнародны марафон на дыстанцыі 1 км, 4,2 км, 10 км, 42,195 км. У ім возьмуць удзел 250 спартсменаў і прыкладна 10 тыс. аматараў бегу.
Паводле слоў Юспы, чакаецца, што ў спартыўных мерапрыемствах у межах свята горада возьмуць удзел больш за 70 тыс. чалавек.
Цяпер чытаюць
Музыка Цім Суладзэ: Розніца 30 гадоў — тое, што адпавядае маім уяўленням пра адносіны13
Каментары