Паказанні засакрэчаных сведак і допыт мытнікаў: прайшлі чацвёртае і пятае пасяджэнні па «справе Вясны»
У судзе Ленінскага раёна Мінска 11 і 12 студзеня працягнуўся суд па «справе Вясны», дзе галоўны абвінавачаны — нобелеўскі лаўрэат Алесь Бяляцкі. «Вясна» сабрала тое асноўнае, што ўдалося пра гэтыя пасяджэнні даведацца.
Чацвёртае судовае пасяджэнне: паказанні засакрэчаных сведак, хворыя праваабаронцы ў кайданках
11 студзеня суд працягнуў знаёміцца з паказаннямі сведак. Але ніводзін з іх не быў дапытаны асабіста па розных прычынах — у асноўным таму, што знаходзяцца за мяжой. На судзе зачыталі іх паказанні, дадзеныя падчас следства. Сярод іх, напрыклад, паказанні магілёўскага праваабаронцы Барыса Бухеля.
Акрамя гэтага, суддзя знаёмілася з пратаколамі допыту двух сведак са змененымі прозвішчамі. Але суддзя Марына Запаснік не зачытвала гэтыя паказанні ўголас «у мэтах бяспекі» гэтых засакрэчаных сведак.
Трох праваабаронцаў працягваюць утрымліваць на судзе ў клетцы ў кайданках, негледзячы на іх хадайніцтвы на папярэдніх пасяджэннях зняць іх. Уладзь Лабковіч, якому за дзень да таго выклікалі «хуткую» на суд, працягвае хварэць. Захварэў таксама і Алесь Бяляцкі.
Пятае судовае пасяджэнне: допыт мытнікаў і лічбы са столі
І 12 студзеня на гэтым судзе працягвалі дапытваць сведак і зачытваць іх паказанні. На першым пасяджэнні Алесь Бяляцкі заявіў, што па справе ўсяго праходзяць каля 100 сведак і было праведзена 120 ператрусаў па ўсёй краіне.
Марына Запаснік усё ж такі агучыла паказанні засакрэчаных сведак, адной з якіх з'яўляецца Карповіч. Валянцін Стэфановіч на першым пасяджэнні настойваў, што гэта прапагандыстка «СБ» Алена Красоўская і прасіў выдаліць яе з залі суда. Суддзя не задаволіла хадайніцтва праваабаронцы, бо нібыта гэта толькі яго здагадкі. У «мэтах бяспекі» прозвішчы двух сведак у матэрыялах справы былі змененыя.
Таксама 12 студзеня дапыталі супрацоўнікаў мытнай службы. Спецыяліст Мытнага камітэта на судзе заявіў, што нібыта з 2011 па 2021 год у інтарэсах ПЦ «Вясна» ў Беларусь было ўвезена два мільёны даляраў. Крымінальная адказнасць за ўвоз наяўных грошай у буйным памеры без дэкларавання была ўведзеная ў Беларусі толькі ў 2016 годзе, таму ў крымінальнай справе фігуруе сума каля 250 тысяч даляраў за гэты перыяд. З паказанняў мытнікаў стала зразумела, што гэтыя сумы ім былі прадыктаваныя іншымі структурамі. Невядома, адкуль узяліся такія лічбы і як абвінавачванне будзе пацвярджаць іх.
Шостае судовае пасяджэнне прызначана на 13 студзеня на 10:30.
Чытайце таксама:
Трэці дзень суда па «справе «Вясны»: праваабаронцы зноў просяць зняць з іх кайданкі
На судзе па «справе «Вясны» затрымалі расійскую праваабаронцу
Каспяровіч, Карповіч… Хто такая прапагандыстка Алена Красоўская, якая сведчыла супраць вясноўцаў
Прапагандыстка Красоўская — сведка абвінавачвання супраць вясноўцаў пад змененым прозвішчам? А прыйшла на суд пад сваім
Пачаўся суд над «Вясной»: першыя за паўтара года ФОТА і ВІДЭА Бяляцкага і калег. Яны патрабуюць, каб суд ішоў па-беларуску
Цяпер чытаюць
Героя тэлефонных зліваў палкоўніка Кісяля, які заклікаў калечыць дэманстрантаў, раптоўна апусцілі на раённы ўзровень10
Каментары