NATO давядзецца ўмацаваць усходнюю мяжу, калі Прыгожын апынецца ў Беларусі — прэзідэнт Літвы
Пра гэта Гітанас Наўседа заявіў пасля пасяджэння Рады дзяржаўнай бяспекі Літвы, на якім абмяркоўвалі спробу бунту «вагнераўцаў», як піша The Guardian.
«Калі Прыгожын або частка групы «Вагнера» апынецца ў Беларусі з незразумелымі планамі і незразумелымі намерамі, гэта будзе азначаць толькі тое, што нам трэба яшчэ больш узмацніць бяспеку нашых усходніх межаў», — сказаў прэзідэнт Літвы.
У суботу Наўседа адрэагаваў на падзеі ў Расіі, дзе найміты з «групы Вагнера» зладзілі ўзброены мяцеж.
«Тое, што я прагназаваў у пачатку агрэсіі супраць Украіны, сёння становіцца рэальнасцю. Крывавая вайна Расіі бумерангам вярнулася ў Расію.
Застаецца толькі шкадаваць, што гэта не паўстанне грамадзянскай супольнасці, а прыватнае войска, сабранае ў турмах, але што пасееш, тое і пажнеш.
Крамлёўскі рэжым сутыкнуўся з тым, што сам жа і стварыў», — канстатаваў прэзідэнт Літвы
***
23 чэрвеня Прыгожын абвясціў, што ідзе «на Маскву», бо не хоча, каб краіна жыла «ў карупцыі і хлусні». Ён заклікаў не супраціўляцца наймітам, інакш яны будуць знішчаць усіх, хто ім будзе замінаць.
Ужо раніцай «вагнераўцы» ўзялі пад кантроль частку вайсковых аб'ектаў Растова-на-Доне і высунуліся ў бок Масквы, прайшоўшы Варонежскую, Ліпецкую і Тульскую вобласці.
У Расіі распачалі супраць яго справу, Пуцін назваў гэта здрадай, а ў Маскве і вобласці ўвялі рэжым контртэрарыстычнай аперацыі.
Аднак ужо ўвечары Прыгожын абвясціў, што разварочвае калоны і ідзе назад. У Крамлі заявілі, што справу супраць яго закрыюць, сам верхавод ПВК «пойдзе ў Беларусь». Таксама яны паабяцалі не пераследаваць яго наймітаў. Гэта стала нібыта следствам перамоваў Прыгожына з Аляксандрам Лукашэнкам. А сама ПВК «Вагнер» пойдзе ў Беларусь.
Цяпер чытаюць
Героя тэлефонных зліваў палкоўніка Кісяля, які заклікаў калечыць дэманстрантаў, раптоўна апусцілі на раённы ўзровень10
Каментары