Ухіліцца ад позвы больш не атрымаецца, а прызываць у войска будуць па СМС — рыхтуюцца змены ў заканадаўстве

Законапраект «Аб змене законаў па пытаннях забеспячэння нацыянальнай бяспекі», апублікаваны на Нацыянальным прававым інтэрнэт-партале, прадугледжвае сярод іншага папраўкі ў закон «Аб воінскім абавязку і воінскай службе».

Уводзіцца новы від позвы — па СМС. «Грамадзяне могуць быць апавешчаныя аб неабходнасці яўкі ў вайсковы камісарыят, упраўленне Камітэта дзяржаўнай бяспекі па вобласці з дапамогай СМС-паведамлення».

Эсэмэскай могуць выклікаць у выпадку мабілізацыі, а таксама на мерапрыемствы па мабілізацыйнай падрыхтоўцы.

Аператары электрасувязі будуць абавязаныя рассылаць СМС па спісах ад ваенкаматаў і КДБ.

Акрамя таго, аператарам давядзецца на запыт ваенкаматаў або КДБ у тыднёвы тэрмін перадаваць звесткі аб нумарах грамадзян, якія стаяць на вайсковым уліку або абавязаныя на ім стаяць.

А самі грамадзяне павінны будуць паведамляць у ваенкамат аб змене асабістага нумара тэлефона.

Што тычыцца папяровых позваў пад распіску, іх зараз можна будзе ўручаць не толькі па месцы жыхарства прызыўніка, але і па месцы працы і «месцы знаходжання» — прасцей кажучы, у любых месцах, дзе чалавека выявяць. Займацца разносам позваў змогуць працаўнікі любых арганізацый, на якія такую ​​задачу ўскладуць ваенкамат, мясцовы выканкам ці КДБ.

Распаўсюджваць інфармацыю аб мабілізацыі і неабходнасці яўкі ў ваенкаматы абавяжуць і ўсе зарэгістраваныя СМІ.

Гэты законапраект пакуль не значыцца на парадку дня на сайце Палаты прадстаўнікоў, але, верагодна, ён будзе ўнесены туды ў найбліжэйшы час. У выпадку яго прыняцця закон уступіць у сілу на наступны дзень пасля афіцыйнага апублікавання.

Не толькі войска

Пазбегнуць атрымання позвы і любога іншага афіцыйнага апавяшчэння зараз будзе нельга не толькі ў выпадку з войскам, але і ва ўсіх іншых сферах жыцця. Гэта прадугледжана законапраектам «Аб змене кодэксаў» — яго парламент ужо адобрыў у двух чытаннях.

Дакумент уводзіць паняцце «юрыдычна значнае паведамленне». Гэта любыя заявы, апавяшчэнні, паведамленні, патрабаванні і іншыя паведамленні, якія цягнуць узнікненне, змяненне або спыненне грамадзянскіх правоў і абавязкаў. 

Такія паведамленні могуць мець месца як пры ўзаемадзеянні дзяржавы з грамадзянінам (выклік у суд, міліцыю, на допыт і іншае), так і ў выпадку здзелак паміж грамадзянамі. Пры гэтым прававыя наступствы ўзнікаюць з моманту дастаўкі паведамлення.

Галоўнае ў гэтым новаўвядзенні — тое, што юрыдычна значнае паведамленне будзе лічыцца дастаўленым нават у тых выпадках, калі яго адправілі поштай або электроннымі сродкамі (па СМС, е-мэйлу, у месенджар), але адрасат «па абставінах, якія залежаць ад яго», гэтага паведамлення не атрымаў ці з ім не азнаёміўся.

Прасцей кажучы, калі чалавек не адчыніў дзверы паштальёну, які прынёс позву, або адключыў тэлефон, каб не атрымаць СМС, — гэта яму ўжо ніяк не дапаможа. 

Факта адпраўкі будзе дастаткова, каб паведамленне лічылася юрыдычна дастаўленым. А гэта значыць, што ўхіліцца ад атрымання такіх паведамленняў будзе немагчыма.

Як сказала на прэс-канферэнцыі, прысвечанай законапраекту, старшыня пастаяннай камісіі Палаты прадстаўнікоў па заканадаўстве Святлана Любецкая, цяпер ёсць выпадкі, што «асобныя ўдзельнікі праваадносін» ухіляюцца ад атрымання паведамленняў, каб не выконваць сваіх абавязкаў.

«Закон сёння агульнага правіла аб тым, калі асоба лічыцца належным чынам апавешчанай, не змяшчаў. Гэты прабел запоўнены. Юрыдычна значныя паведамленні лічацца ўручанымі, і асобы будуць апавешчанымі ў любых выпадках, калі гэта асоба па абставінах, якія залежаць ад яе, не была апавешчана або ўхілілася ад атрымання. Як часта бывае, электронныя сродкі адключаныя, альбо файлы не адкрываюцца, альбо будзе іншае штучнае стварэнне ўмоў для перашкод у атрыманні», — патлумачыла дэпутат.

Гэтая папраўка, верагодна, пачне дзейнічаць яшчэ няхутка. Закон павінен ухваліць Савет Рэспублікі і падпісаць Лукашэнка, а пасля афіцыйнага апублікавання ён уступіць у сілу праз год.

• 4
• 0
• 9
• 11
• 4
• 4
• 57
• 0