Расіяне знізілі колькасць удараў кіраванымі авіябомбамі — Паветраныя сілы УСУ
Пасля значных страт у авіяцыі расіяне істотна знізілі колькасць удараў кіраванымі авіябомбамі (КАБ), і ўжо больш за тыдзень паблізу ўкраінскіх межаў не з'яўляецца самалёт далёкага радыёлакацыйнага выяўлення А-50, паведаміў камандуючы Паветранымі сіламі УСУ генерал-лейтэнант Мікалай Аляшчук.
«Так, вораг працягвае атакаваць нашы пазіцыі кіраванымі авіябомбамі, але падлятаць занадта блізка ўжо не атрымліваецца», — напісаў ён.
Кіраваныя авіябомбы (КАБ) уяўляюць адну з галоўных небяспек для салдат УСУ на фронце і для жыхароў прыфрантавых гарадоў. Расія актыўна выкарыстоўвае для іх скіду бамбавікі Су-34.
У сярэдзіне студзеня стала вядома, што ўкраінскія сілы збілі расійскі самалёт далёкага радыёлакацыйнага выяўлення (ДРЛВ) А-50 і лятаючы камандны пункт Іл-22.
А ў лютым камандаванне УСУ заявіла, што ўсяго за два тыдні з 17 па 29 лютага было збіта 13 расійскіх баявых самалётаў, нашмат больш, чым за папярэднія месяцы вайны. Прычым 10 са збітых самалётаў — бамбавальнікі Су-34.
Агулам па стане на 29 лютага Расія, паводле звестак генштаба УСУ, страціла ўжо 345 вайсковых самалётаў.
Расія ў большасці выпадкаў не прызнае страту сваіх баявых самалётаў, а праверыць гэтыя звесткі незалежна ва ўмовах вайны складана.
Цяпер чытаюць
Палітолаг Аліна Харысава пагадзілася супрацоўнічаць з СБУ. Аказалася, гэта было КДБ9
Каментары