Прапагандысты з Малі абвінавацілі ў разгроме вагнераўцаў «спецназ НАТА». Нават у Расіі пасмяяліся
Малійскія прапагандысты вырашылі скарыстацца вядомым крамлёўскім наратывам, што ў любых уласных паразах вінаватыя вайскоўцы НАТА, і прыплесці яго да нядаўняга разгрому вагнераўцаў ад мясцовых плямёнаў у пустэльні. У Расіі, аднак, такі падыход не ацанілі.
Расійскае агенцтва «РИА Новости» на фоне разгрому калоны вагнераўцаў у Малі ўзяло каментар у мясцовага малійскага «эксперта-палітолага», які выказаў новую афіцыйную версію паразы расійскіх наймітаў у пустэльні.
Па сцвярджэннях малійскага прапагандыста, вагнераўцы пацярпелі паразу не ад паўстанцаў-туарэгаў, а ад «спецназа краін НАТА пад прыкрыццём, які ўсё спланаваў пасекундна». А тыя, хто думае інакш, памыляюцца, мяркуе «эксперт».
Гэтую версію падзей і факт яе з'яўлення ў расійскіх медыя адразу высмеяў буйны расійскі ваенкар «Рыбарь», які падкрэсліў, што тлумачыць свае паразы выхадкамі салдат НАТА не трэба, бо гэтая недаацэнка мясцовых ворагаў толькі шкодзіць планаванню будучых аперацый і выстаўляе аўтараў такіх наратываў у нявыгадным святле.
«Рыбарь» у гэтым кантэксце казаў менавіта пра малійскую прапаганду і выказаў надзею, каб «Расія хутчэй навучыла малійцаў», што не трэба недаацэньваць ворагаў.
«Гэта магло б гучаць як анекдот, калі б не трагічнасць сітуацыі. Так, мы ведаем, што ў Малі вельмі балюча ўспрымаюць любыя страты ў вайне з баевікамі. І так, узровень афрыканскіх СМІ і экспертаў рэгіянальных выданняў пакідае жадаць лепшага: падобных нічым не пацверджаных заяў там гаць гаці.
Але вось навошта РІА вырашыла прыцягнуць гэтую навіну да сябе ў стужку, увогуле не ведаем. Недаацэнка праціўніка ў асобе туарэгаў і выдумлянне апраўданняў толькі ўскладняе задачу па падрыхтоўцы і планаванні будучых бітваў. І лепш бы расійскаму боку хутчэй навучыць гэтаму малійцаў. Урэшце, і мы самі праз гэта праходзілі», — напісаў вядомы расійскі ваенкар «Рыбарь».
Сам па сабе наратыў пра датычнасць НАТА да няўдач Расіі выкарыстоўваецца Крамлём заўсёды. На думку расійскіх уладаў, прапагандыстаў і шматлікіх ботаў у сацсетках, менавіта блок НАТА нібыта вінаваты ў развязванні вайны ва Украіне, менавіта Захад нібыта зайздросціць магчымасцям і магутнасці Расіі і менавіта заходнія ўзбраенні і салдаты нібыта не даюць украінцам прайграць на полі бою.
Недаацэнка Крамлём украінскай арміі і жаданне замаўчаць яе перамогі часам набываюць іншыя формы, калі, напрыклад, збіццё Украінай расійскіх каштоўных самалётаў тлумачыцца прапагандай ці іх «тэхнічнай няспраўнасцю», ці «памылковым абстрэлам» з боку сваіх жа расійскіх сістэм СПА.
Цяпер чытаюць
Героя тэлефонных зліваў палкоўніка Кісяля, які заклікаў калечыць дэманстрантаў, раптоўна апусцілі на раённы ўзровень9
Каментары