«Вось за гэта вас, хачэй, і ненавідзяць!» Комік Мірзалізадэ расказаў, ці можна лічыць беларусаў талерантнымі
У новым выпуску ТОКу комік Ідрак Мірзалізадэ выказаў свой погляд на стаўленне беларусаў да не такіх, як яны.
Сям'я Ідрака Мірзалізадэ пераехала з Азербайджана ў Беларусь, калі яму было 2 гады. Паводле нацыянальнасці ён талыш. У Мінску Ідрак скончыў не толькі сярэднюю школу, але і факультэт журналістыкі БДУ. Зыходзячы з уласнага жыццёвага вопыту, комік расказвае пра спецыфічнае стаўленне беларусаў да людзей, якія ад іх адрозніваюцца.
«Такое ёсць у Беларусі. Сто адсоткаў ёсць», —
сцвярджае Ідрак і ў якасці прыкладу прыводзіць выпадак з свайго дзяцінства:
«Мне тата падарыў мяч. Я прыйшоў у школу. Старэйшы за мяне [хлопец] спытаў: «Можна я пагуляю ў мяч?» І я сказаў «Не». Ён сказаў: «Вось за гэта вас, хачэй, і ненавідзяць!»
«Гэта смешная сітуацыя, дурацкая. Але такое ёсць. На іншасці заўсёды ва ўсіх краінах глядзяць з жахам, [бо] не ведаюць, што гэта, дзе гэта. Толькі з-за таго, што для кагосьці гэта штосьці новае», — выказвае сваё меркаванне Мірзалізадэ.
Комік таксама згадвае пра існаванне ў Беларусі групоўкі фанатаў мінскага футбольнага клубу «Дынама».
«Дынамікі» былі — фанаты «Дынама» (Мінск), якія «нібы» нацыкі. «Нібы». Нібы такія супраць чагосьці», — з усмешкай расказвае Ідрак, акцэнтуючы ўвагу на слове «нібы», пальцамі беручы яго ў дужкі.
Згадваючы пачатак 2000-х, Ідрак заўважае, што ў той час у Беларусі адносіны да людзей з Каўказу не мелі той вастрыні, як, напрыклад, у Расіі.
«Але гэта ёсць. Таму не трэба лічыць, што беларусы — гэта добрыя-добрыя людзі. Зразумела, што жах да іншасці ёсць і там. Гэта зразумела», —
падкрэслівае Мірзалізадэ і для пацвярджэння свайго погляду звяртае ўвагу на міжнацыянальныя адносіны сярод мігрантаў за мяжою:
«Можаш заўважыць, што мігранты-мусульмане вельмі раздражняюць нашых славянскіх мігрантаў у Еўропе. І ты думаеш: «Блін, ты такі ж самы мігрант, як і гэты мігрант-мусульманін. Давай-ка супакойся». Таму не пытай, калі ласка, ці ёсць у беларусаў вось гэта штосьці там…. Ёсць».
Глядзіце цалкам:
Цяпер чытаюць
21‑гадовага курсанта Акадэміі авіяцыі асудзілі за Гаюна1
21‑гадовага курсанта Акадэміі авіяцыі асудзілі за Гаюна
«Спасибо, Лена! Продолжайте вести наблюдение». Афіцэр, які пісаў Харысавай, пасвіўся ў чатах палітэміграцыі, а некаторым дзяўчатам нават прапаноўваў абмяняцца нюдсамі9191
Каментары