Расія нанесла масіраваны ўдар па гарадах Украіны, у Кіеве — дзевяць загінулых, 63 параненыя
Удар быў таксама нанесены па Харкаве.
У выніку расійскага ўдару ракетамі і дронамі ў Кіеве гэтай ноччу, паводле апошніх звестак, загінулі дзевяць чалавек, паведамляе Бі-бі-сі са спасылкай на выратавальную служба Украіны.
«Паводле папярэдніх звестак, загінулі дзевяць чалавек, 63 пацярпелі, 42 шпіталізаваныя, сярод іх — шасцёра дзяцей», — піша Дзяржаўная служба надзвычайных сітуацый у сацсетках.
Выратавальнікі паведамляюць, што працягваюць пошукі людзей пад заваламі жылых дамоў.
Пажары, як піша ДСНС, успыхнулі ў гаражах, а таксама ў нейкіх адміністрацыйных і нежылых будынках. Акрамя таго, гарэлі аўтамабілі.
Таксама расіяне два разы ўдарылі па Харкаве.
«Харкаў другі раз за ноч — пад атакай крылатых ракет. Было чутна два выбухі, у паветры яшчэ ёсць ракета», — напісаў у тэлеграм-канале мэр Харкава Ігар Церахаў.
Пра ракеты, што ляцелі на Харкаў, і выбухі паведамілі і многія маніторынгавыя і навінавыя ўкраінскія тэлеграм-каналы.
Перад гэтым Церахаў расказаў, што падчас першай хвалі ўдараў у Харкаве было 19 траплянняў ракет і «шахедаў».
«Былі трапленні сямі крылатых ракет, акрамя таго, былі трапленні 12 шахедаў па вытворчым прадпрыемстве горада Харкава, акрамя таго, побач з жылымі дамамі: прыватнымі жылымі дамамі і шматпавярховымі жылымі дамамі», — сказаў мэр.
Некаторыя з харкаўскіх карыстальнікаў сацсетак паведамлялі, што трапленні былі ў раёне Харкаўскага трактарнага завода.
Каментары