«Зло і вар’яцтва». MAGA-актывісты сталі патрабаваць адстаўкі Трампа за здраду ідэі «Амерыка перш за ўсё»
У той час як рэспубліканцы ў Кангрэсе дэманструюць практычна поўную лаяльнасць Дональду Трампу, яго прыхільнікі ў медыяасяроддзі, якія актыўна дапамагалі яму прыйсці да ўлады, адчуваюць сябе здраджанымі. Падчас перадвыбарчай кампаніі Трамп абяцаў пакончыць з «вечнымі войнамі», у якіх грузнуць ЗША, і засяродзіцца на адраджэнні Амерыкі. Кансерватыўных каментатараў таксама шакавала пагроза Трампа знішчыць «цэлую цывілізацыю», калі Іран не пагодзіцца спыніць агонь, і нават яго нападкі на іслам, піша The Moscow Times.
Самы гучны і доўгі адлуп Трампу даў вядомы інтэрв'юер Такер Карлсан, які і актыўна падтрымліваў Трампа, і праславіўся інтэрв'ю з іншым «моцным лідарам» — Уладзімірам Пуціным. У 43‑хвілінным маналогу ўвечары ў панядзелак Карлсан назваў нядзельны пост Трампа «агідным ва ўсіх адносінах» і абвінаваціў яго ў тым, што той пагражае здзейсніць ваеннае злачынства.
«Як вы смееце так гаварыць з краінай у велікодную раніцу? — заявіў Карлсан у сваім падкасце. — Кім вы сябе ўявілі? Вы публікуеце пост з мацюком у велікодную раніцу».
Трамп напісаў на Вялікдзень, што ў аўторак Ірану трэба будзе перажыць неверагодныя бамбардзіроўкі электрастанцый і мастоў, «усё ў адным флаконе»:
«Нічога падобнага яшчэ не было!!! Адкрыйце гэты ё…ны праліў, шалёныя вырадкі, альбо вы будзеце жыць у Пекле! — ПРОСТА ГЛЯДЗІЦЕ! Слава Алаху».
Адна з самых зацятых у мінулым прыхільніц Трампа, Марджэры Тэйлар Грын, якая нядаўна пакінула Палату прадстаўнікоў Кангрэса, адрэагавала ў той жа дзень:
«Кожны член яго адміністрацыі, які называе сябе хрысціянінам, павінен упасці на калені, прасіць прабачэння ў Бога, перастаць пакланяцца прэзідэнту і перашкодзіць вар’яцтву Трампа. Гэта не вяртае Амерыцы былую веліч, гэта зло».
У аўторак, пасля чарговага жарснага паста Трампа пра тое, што «загіне цэлая цывілізацыя і яе ўжо ніколі не адродзяць», калі Іран не пагодзіцца на перамір’е да вызначанага ім тэрміну, Тэйлар Грын напісала:
«25‑Я ПАПРАЎКА!!! На Амерыку не скінулі ніводнай бомбы. Мы не можам знішчыць цэлую цывілізацыю. Гэта зло і вар’яцтва».
25‑я папраўка да Канстытуцыі ЗША вызначае парадак перадачы ўлады віцэ-прэзідэнту ў выпадку датэрміновага спынення паўнамоцтваў прэзідэнта або яго недзеяздольнасці.
Да адстаўкі Трампа заклікаў і ультраправы прыхільнік тэорый змовы Алекс Джонс, які гадамі яго абараняў і падтрымліваў. Джонс не змог стрымаць эмоцый у сваім відэападкасце і назваў Трампа «чалавекам, схільным да рызыкі развіцця дэменцыі», якога неабходна адхіліць ад пасады.
«Як ні сумна, Трампа, якога мы ўсе ведалі і любілі, больш няма», — заявіў Джонс.
Выданне Axios прыводзіць і іншыя прыклады расчаравання ў Трампе ўплывовых прыхільнікаў MAGA. Так, палітычная актывістка і кансерватыўная публіцыстка Кэндзіс Оўэнс назвала прэзідэнта «генацыдальным псіхапатам» і запатрабавала ад Кангрэса і ўзброеных сіл умяшацца ў яго палітыку.
Бунт выходзіць за межы прыхільнікаў MAGA, якія спадзяваліся на прынцып «Амерыка перш за ўсё». Расчараванне ахапіла таксама цэлую плеяду падкастараў і комікаў.
Самы папулярны падкастар Джо Роган назваў вайну з Іранам «вар'яцтвам, улічваючы тое, з чым ён ішоў на выбары». Комік Цім Дзілан назваў прынцып Трампа «Амерыка перш за ўсё» «найвялікшай аферай у гісторыі». Іншы комік, Тэа Фон, выкарыстаўшы слова з поста Трампа, назваў не Іран, а ЗША і Ізраіль «ё…нымі тэрарыстамі».
Кансерватараў таксама абурылі «цывілізацыйныя» пагрозы Трампа і яго выпады супраць ісламу. Карлсан панаракаў, што прэзідэнт хоча выкарыстоўваць «нашы ўзброеныя сілы для знішчэння цывільнай інфраструктуры ў іншай краіне, гэта значыць здзейсніць ваеннае злачынства». Акрамя таго, «ніводзін прыстойны чалавек не здзекуецца з чужой рэлігіі», заявіў Карлсан, абрынуўшыся на Трампа за згадку Алаха:
«Здзекавацца з чужой веры — значыць здзекавацца з самой ідэі веры».
Аднак жа, хоць пара дэмакратаў-кангрэсменаў разам з Тэйлар Грын заклікалі прызнаць прэзідэнта недзеяздольным, рэспубліканцы ў Кангрэсе захоўваюць да яго поўную лаяльнасць. Што тычыцца шараговых амерыканцаў, то апытанне Pew Research Center паказала, што 35% амерыканцаў давяраюць палітыцы Трампа ў дачыненні да Ірана, тады як 64% — не давяраюць.
Трамп прадказаў «залаты век» на Блізкім Усходзе на фоне перамір’я з Іранам
Трамп: Сёння ўначы загіне цэлая цывілізацыя
Трамп назваў новы дэдлайн ультыматыму Тэгерану, «інакш Іран ператворыцца ў каменны век»
Трамп не пераймаецца, што амерыканцы могуць здзейсніць у Іране ваенныя злачынствы
«Адкрыйце гэты чортавы праліў, шалёныя вырадкі!» Трамп анансаваў пекла ў Іране ўжо ў гэты аўторак
Цяпер чытаюць
Сям’ю з Мінска будуць судзіць за здраду дзяржаве і кантрабанду зброі. Іх, падобна, затрымалі на мяжы — вось што вядома7
Каментары
Дадайце для кантэксту, што Карлсан ня проста ўзяў інтэрвію ў путлера – гэта было сьвядомай часткай ягоных поглядаў, прарасейскай пазыцыі, якую ён выказваў гадамі. Карлсан – крымнашыст, які шырыў фэйкі пра «ўкраінскія біялябараторыі», «перасьлед расейскамоўных у Прыбалтыцы», «дадзеным рашцы абяцаньні аб непашырэньні НАТА» і г.д. І само інтэрвію было такім чыста паводле назвы, а насамрэч было падборкай выгодных пытаньняў, якія давалі путлеру прастору выказаць сваё трызьненьне пра «ісконно русскіе землі». У выніку Карлсан проста задаваў пытаньне, пасьля чаго даваў шмат хвілінаў на слоўную дыярэю путлера.