Намеснік старшыні міжнароднай маладзёжнай арганізацыі «Малады Фронт» (Чэхія) Мікалай Дземідзенка 14 лютага падаў у Мінгарвыканкам заяўку на правядзенне ў сталіцы 25 сакавіка шэсця да Дня Волі.
Як паведаміў БелаПАН Дземідзенка, згодна з заяўкай, шэсце павінна пачацца, а 18 гадзіне на плошчы Свабоды. Яго ўдзельнікі плануюць прайсці да плошчы Незалежнасці.
«Мы заклікаем адзначыць Дзень Волі не толькі пад лозунгам вызвалення палітзняволеных.
Дзень Волі павінен праходзіць пад лозунгам «Саша, сыходзь!», — мяркуе Дземідзенка.
Паводле яго слоў, «Малады фронт» не можа пагадзіцца на ўмовы правядзення акцыі, прапанаваныя іншымі дэмакратычнымі рухамі, якія не маюць дастатковага вопыту ў правядзенні вулічных акцый, такіх як рух «За Свабоду», Партыя БНФ, ініцыятыва «Гавары праўду!», саюз «За мадэрнізацыю», партыя «Зялёныя», аргкамітэт па стварэнні Партыі свабоды і прагрэсу. Гэтыя структуры ініцыявалі шэсце 25 сакавіка па маршруце Акадэмія Навук — сквер Янкі Купалы.
«У выпадку блакіравання 25 сакавіка плошчы Свабоды збор удзельнікаў акцыі будзе адбывацца на Кастрычніцкай плошчы», — зазначыў Дземідзенка.
Нагадаем, 14 лютага ў Мінгаравыканкам таксама была пададзена заяўка на правядзенне ў сталіцы 25 сакавіка вулічнай акцыі, прысвечанай чарговым угодкам абвяшчэння Беларускай Народнай Рэспублікі (БНР). Заяўку ў гарвыканкам падпісалі лідары Партыі БНФ Аляксей Янукевіч і руху «За Свабоду» Аляксандр Мілінкевіч, намеснік старшыні Аб’яднанай грамадзянскай партыі Леў Марголін, прадстаўнікі кампаніі «Гавары праўду!» Андрэй Дзмітрыеў, руху салідарнасці «Разам» Алесь Макаеў і аргкамітэта па стварэнні партыі «Беларуская хрысціянская дэмакратыя» Ірына Губская.
Мітынг мяркуецца пачаць у 18.00 каля будынка прэзідыума Нацыянальнай акадэміі навук. У 19.00 павінна пачацца шэсце да сквера імя Янкі Купалы, дзе з 20.00 да 21.00 плануецца правесці яшчэ адзін мітынг. Акцыя пройдзе пад лозунгамі «Свабода палітзняволеным!» і «Беларусь будзе вольнай!».
Цяпер чытаюць
Скандал у полацкай школе: маці сцвярджае, што яе сына збілі на трэніроўцы па дзюдо — так хлопца «выхоўваў» трэнер10
Каментары