Палітвязень напісаў, як яго прымушаюць пісаць у калоніі прашэнне аб памілаванні.
Палітвязень Мікіта Ліхавід напісаў, як яго прымушаюць пісаць у калоніі прашэнне аб памілаванні.
«І яшчэ, я не хачу, каб маім імем гандлявалі, як фішкамі на картачным стале. Гэта я да таго, што калі ў каго-небудзь ёсць думкі выпускаць фігурантаў справы "19 снежня 2010 года», за нейкія «пернікі», то я адмаўляюся ўдзельнічаць у гэтым шабашы. Хай выпускаюць тых, хто вінаваты і жыве па рэжыме, а
я сваё імя і свой гонар за магчымасць есці пернікі са згушчонкай не прадаю».Пра гэта напісаў палітвязень Мікіта Ліхавід маці.
Маці Мікіты Ліхавіда атрымала ў пятніцу ліст ад сына, які адбывае тэрмін у Наваполацкай калоніі №10. «Мяркуючы са словаў Мікіты, я зрабіла выснову (гэта чыста мае здагадкі), што агульная тэндэнцыя, калі ў «дзекабрыстаў» патрабуюць падпісваць розныя просьбы, дакацілася і да Наваполацкай калоніі.
Мікіта напісаў: «У гэтым шабашы я ўдзельнічаць не збіраюся», намякаючы, што ўлада хоча сарваць куш на прашэнні палітвязняў аб памілаванні», - расказала Алена Ліхавід.
«Я тут як на складзе, а адміністрацыя ўсяго толькі глядзіць, каб з гэтага склада нічога не прапала. Мне, каб выйсці, не лаяльнасць начальніка патрэбная, а вырак суда. Тут сістэма простая: будзе паперка - яны выпусцяць, адкрыюць браму і адпусцяць на ўсе чатыры бакі, а не будзе - значыць, не. А ад таго, дзе я сяджу, у зоне або ў СІЗА, розніцы няма, я сяджу!» - піша Мікіта Ліхавід.
«Я ішоў на плошчу таму, што хачу жыць у свабоднай краіне.Каб у міліцыі служылі годныя людзі, а не ўсе запар. Годных міліцыянтаў у наш час амаль не засталося, і, як правіла, яны ўсе са «старой гвардыі» і хутка сыдуць на пенсію ў маленькіх званнях. Афіцэраў, а тым больш з «вялікімі пагонамі», якія вартыя сваіх званняў, наогул адзінкі. Я хацеў, каб працоўныя ганарыліся сваёй прадукцыяй, каб моладзь не співалася да 30-ці гадоў. Вось за што я ішоў на Плошчу і гатовы пакутаваць за свае ідэі, гатовы пакутаваць за людзей (не звяртаючы ўвагі на тое, хто яны: рабочыя, бізнэсоўцы або арыштанты, якія паўжыцця сядзяць у турме), столькі, колькі спатрэбіцца. За іх права мець магчымасць жыць у дастатку з пачуццём гонару за сваю краіну, а не бегчы за мяжу ў пошуках лепшага месца», - піша Мікіта Ліхавід.
Маці зняволенага Алена паведаміла, што яе сына змясцілі на 3 месяцы ў ПКТ - гэта так званае «памяшканне камернага тыпу». Туды змяшчаюць тых, хто шмат разоў парушаў турэмныя правілы і, як лічаць турэмшчыкі, не стаў на шлях выпраўлення. Як сказала Алена Ліхавід, у чацвер-пятніцу ў калонію паедзе адвакат Дар'я Ліпкіна, у якой, магчыма, атрымаецца высветліць лёс палітвязня.
Па словах жанчыны,
у Мікіты Ліхавіда з'явіліся праблемы са страўнікам і кішэчнікам.Пасля звароту да дактароў яго здароўе быццам наладзілася, але ва ўмовах, калі Мікіта Ліхавід фактычна не выходзіць з ШІЗА, праблемы непазбежныя. «Нават паводле Крымінальна-выканаўчага кодэкса вязням ШІЗА даюць урэзанае харчаванне», - кажа Алена Ліхавід.
Цяпер чытаюць
Палітолаг Аліна Харысава пагадзілася супрацоўнічаць з СБУ. Аказалася, гэта было КДБ36
Каментары