Сумка з небяспечным грузам магла трапіць туды на тэрыторыі Літвы.
Аб гэтым Еўрарадыё расказаў Арунас Індрашус, генеральны дырэктар кампаніі TOKS, якой належыць аўтобус.
«Ёсць маршрут — Мінск-Паланга. Адзін аўтобус абслугоўваў у пятніцу гэты маршрут. У 12.30 ён выехаў з Вільні ў Мінск, а потым, у 18.40 выехаў у Літву. У 22.30 ён быў у Вільні, тут замяніліся кіроўцы і ён паехаў на Палангу, а раніцай адтуль вярнуўся ў Вільню».
Спадар Арунас распавёў, што сумка з мінай магла трапіць у аўтобус у Вільні, альбо на нейкім са шматлікіх прыпынкаў па шляху да Палангі.
Кіроўца знайшоў сумку яшчэ ў Паланзе, але вырашыў яе прывезці ў Вільню і толькі там адкрыў.
Іншыя падрабязнасці здарэння не раскрываюцца ў інтарэсах следства. Усе тры кіроўцы, якія працуюць на гэтым аўтобусе, застаюцца на свабодзе. З імі працуе паліцыя.
Намеснік кіраўніка Ашмянскай мытні Сяргей Самушчаў падцвердзіў Еўрарадыё, што аўтобус з мінай у Вільню прыехаў не са сталіцы Беларусі, а з Палангі.
Разам з тым ён адмовіўся каментаваць тое, якім чынам праводзіўся надгляд аўтобуса на шляху з Мінска.
Нагадаем, што у суботу ранкам на аўтавакзале Вільні была знойдзеная сучасная супрацьтанкавая міна. Першапачаткова паведамлялася, што у сталіцу Літвы яе прывёз аўтобус Мінск-Вільня. Кіроўца нібыта пагадзіўся прывезці перадачу са сталіцы Беларусі, а калі аддаваў яе у Вільні, то зазірнуў унутр і выклікаў паліцыю.
Цяпер чытаюць
Героя тэлефонных зліваў палкоўніка Кісяля, які заклікаў калечыць дэманстрантаў, раптоўна апусцілі на раённы ўзровень12
Каментары