Адна з найбуйнейшых літоўскіх кампаній па-ранейшаму цікавіцца Беларуссю.
Пра гэта паведаміў прэзідэнт канцэрна кампаній «Ахема Груп» Арунас Лаўрынайціс на VIII міжнародным эканамічным форуме ў Гродне. Паводле яго словаў, удзел у ААТ «Торфабрыкетны Завод Ашмянскі» эксперыментальны. Канцэрн цікавяць яшчэ некалькі беларускіх прадпрыемстваў. На сённяшні дзень паміж літоўскім і беларускім бакамі ідуць перамовы, афармляецца бізнэс-план аб стварэнні сумеснага прадпрыемства.
Дырэктар Ашмянскага торфабрыкетнага завода Аркадзь Кіркоўскі пацвердзіў гатоўнасць прадаць 50-працэнтны пакет акцый прадпрыемства.
«Мы зацікаўленыя ў супрацоўніцтве, удзел літоўскіх партнёраў прывядзе да павелічэння аб'ёмаў вытворчасці і паставак на экспарт», - лічыць ён.
Торф прадпрыемства здабывае на радовішчы Мікулішкі ў Ашмянскім раёне. Торфабрыкет пастаўляюць на ўнутраны рынак і ў краіны Балтыі. Цікавяць рынкі для пашырэння экспартнай геаграфіі - Германія, Латвія, Літва, Польшча, Чэхія. Паводле ацэнак спецыялістаў, запасаў прыроднага паліва хопіць не менш чым 30 гадоў. Магчыма, пастаўкі ашмянскага торфу будуць ажыццяўляцца ў тым ліку для пакрыцця футбольных палёў і палёў для гольфа ў краінах Еўропы.
Канцэрн «Ахема груп» працуе з Гродне не толькі на перавалцы ўгнаенняў вытворчасці ААТ "Гродна Азот". Акрамя лагістыкі ў Клайпедскім порце ёсць супрацоўніцтва ў куплі і продажы асобных тавараў. Кампанія плануе выйсці на аб'ём тавараабароту з кампаніямі Беларусі ў 100 мільёнаў еўра. Асноўнымі партнёрамі канцэрна летась сталі таксама ААТ «Беларуськалій» і РУП «Беларускі металургічны завод». Канцэрну належыць больш за 30 прадпрыемстваў рознага профілю ў Літве і за мяжой, у тым ліку KLASCO.
KLASCO належыць адзін з двух тэрміналаў у Клайпедзе, праз якія ажыццяўляецца перавалка беларускіх угнаенняў. Таксама «Ахема груп» з'яўляецца другім па велічыні пасля дзяржавы саўладальнікам кампаніі Klaipedos nafta. У дзяржавы - 70,63% акцый нафтатэрмінала, у Achemos grupe - 9,58%. «Ахема груп» - трэцяя па абароце ў Літве. У 2011 годзе атрыманы даход парадку 1 мільярда еўра.
Найбуйнейшым акцыянерам «Ахема груп» з'яўляецца Лідзія Лубень - спадчынніца добра вядомага ў Беларусі кіраўніка Літоўскай канфедэрацыі прамыслоўцаў Браніславаса Лубіса, заўчасна памерлага ў канцы мінулага года.
Цяпер чытаюць
Хто забараняе ў Беларусі кнігі — вось гэтыя 22 чалавекі33
Каментары