Каляндар
22 лютага 1900 нарадзіўся Люіс Бунюэль, гішпанскі рэжысэр. Бунюэль паходзіў з шматдзетнай сям’і заможнага земляўласьніка. Яго паслалі вучыцца ў езуіцкі каледж, дзе ён і пачаў сумнявацца ў рэлігіі. Канчаткова да “атэізму” ён прыйшоў у Мадрыдзкім унівэрсытэце пад уплывам выкладчыкаў з “пакаленьня 1898”. У кіно ён дэбютуе разам з Далі, здымаючы “Андалускага сабаку”. Бунюэля крытыкавалі за жорсткасьць і просталінейнасьць, але ягоныя фільмы заўсёды мелі посьпех: “Сьціплы шарм буржуазіі”, “Дзённая красуня”. Пры канцы жыцьця Бунюэль страціў слых, потым зрок, аднак працаваў над кнігай мэмуараў, якой даў назву “На апошнім уздыху”.
24 лютага 1875. У Францыі прымаюцца канстытуцыйныя законы Трэцяй рэспублікі, згодна зь якімі гэтая краіна стала самай дэмакратычнай у Эўропе. Францускія законы далі мажлівасьць беларусам-эмігрантам знаходзіць тут прытулак. А ўжо ў гэты час у Парыжы жыў адзін з кіраўнікоў антырасейскага паўстаньня 1863 г., генэрал Парыскай камуны Валеры Ўрублеўскі.
28 лютага 1925 памірае прэзыдэнт тады яшчэ дэмакратычнай Нямеччыны Фрыдрых Эбэрт, адзін са стваральнікаў ваймараўскай Нямеччыны. У пачатку 20-х незалежная антыпольская партызанка ў Заходняй Беларусі, інсьпіраваная Радай БНР Вацлава Ластоўскага, фінансавалася ўрадам Эбэрта. Так немцы спрабавалі падрываць моц маладой польскай дзяржавы. Пасьля Эбэрта прэзыдэнтам стаў Паўль фон Гіндэнбург, які ў першую сусьветную камандаваў нямецкімі войскамі на Ўсходнім фронце. Менавіта Гіндэнбург выдаў афіцыйны дазвол нацыянальнасьцям акупаваных тэрыторыяў на культурную дзейнасьць, адкрыцьцё нацыянальных школ, выданьне газэт на роднай мове. Як вынік, у Заходняй Беларусі ўпершыню ў ХХ ст. паўсталі некалькі дзясяткаў беларускіх школ, а ў Вільні пачала выдавацца газэта “Homan”.
28 лютага 1950 Міністэрства гандлю СССР выдала загад, згодна зь якім цэны ў вясковых крамах мусілі быць на 7% большыя, чым у гарадзкіх. І без таго дрэннае становішча вяскоўцаў яшчэ пагоршылася.
У 1325 г. вялікі князь літоўскі Гедымін падпісвае дамову аб сумесных дзеяньнях супраць крыжакоў з польскім каралём Уладзіславам Лакеткам. Пачатак саюзных дачыненьняў Літвы і Польшчы. Наперадзе безьліч падзеяў супольнай гісторыі: Крэўская унія 1385 г., Грунвальдзкая бітва 1410 г., Рэч Паспалітая і антырасейскія паўстаньні “за нашу і вашу волю”; а таксама апалячваньне, набыцьцё тутэйшасьці, зьяўленьне “касьцельных палякаў”.
А.Г.
Цяпер чытаюць
21‑гадовага курсанта Акадэміі авіяцыі асудзілі за Гаюна1
21‑гадовага курсанта Акадэміі авіяцыі асудзілі за Гаюна
«Спасибо, Лена! Продолжайте вести наблюдение». Афіцэр, які пісаў Харысавай, пасвіўся ў чатах палітэміграцыі, а некаторым дзяўчатам нават прапаноўваў абмяняцца нюдсамі9191
Каментары