Naviny haspadarki ad 27 traŭnia

Rubla nia budzie

Biełaruski bok aficyjna painfarmavaŭ Centrabank Rasiei ab niemahčymaści ŭviadzieńnia ŭ krainie rasiejskaha rubla z 1 studzienia 2006 hodu. Padstava — techničnyja pryčyny. Pra heta zajaviŭ 24 traŭnia ŭ Maskvie namieśnik staršyni ŭradu — paŭnamocny pradstaŭnik prezydenta Biełarusi Vasil Daŭhaloŭ. “Prezydenty, kaniečnie, mohuć dać adpaviednyja daručeńni, ale pa lohicy my nie ŭkładajemsia ŭ terminy”. Słovy čynoŭnika paćvierdziŭ i načalnik upraŭleńnia infarmacyi Nacbanku Anatol Drazdoŭ.

Dla techničnaj realizacyi ŭviadzieńnia rasiejskaha rubla patrabujecca šeść miesiacaŭ, ale pierad hetym treba padpisać pahadnieńnie ab biudžetnaj palitycy, jakoje jašče nie hatova. Novyja terminy ŭviadzieńnia adzinaj valuty abmiarkujuć u listapadzie.

Kambajn-cud

Respublikanskaje ŭnitarnaje pradpryjemstva “DSKB pa ziernieŭboračnaj i kormaŭboračnaj technicy” vytvorčaha abjadnańnia “Homsielmaš” stvaraje novy vysokapradukcyjny kambajn “Lida-1700”. Biełaruskaja mašyna budzie analaham niamieckaha kambajnu “Leksijon-560”, jaki maje mahutnaść 360 konskich sił i zdolny pierapracoŭvać da 14 kh ziernievaj masy ŭ sekundu. Heta dazvalaje žać biaz strat paletki z uradžajnaściu 80—150 centneraŭ z hiektaru. Patreby Biełarusi — ad 50 da 150 mašyn u hod. Da kanca 2006 hodu planujecca vypuścić niekalki doślednych uzoraŭ, a ŭ

2007 h. — pieršuju partyju novych superkambajnaŭ. Źbirać karabli paloŭ miarkujuć u Lidzie.

Pramarkirujem usio

Minfin planuje pašyryć pieralik tavaraŭ, jakija padlahajuć abaviazkovaj markiroŭcy. Pieralik tavaraŭ, jakija buduć markiravacca, jašče nieviadomy. U sakaviku ŭžo stali markiravać piva i matornyja masły, što dazvoliła značna pavysić pastupleńni akcyzaŭ u biudžet: pa pivie — u 4,1 razu, pa masłach — u 3,2 razu.

Valuty paboleła

Abjom valutnaj vyručki, što pastupiła na rachunki pradpryjemstvaŭ u biełaruskich bankach za studzień—krasavik, skłaŭ 4,861 młrd dalaraŭ u ekvivalencie. Heta na 37,1% bolej, čym na studzień—krasavik minułaha hodu. Pastupleńni ad ekspartu tavaraŭ pavialičylisia na 37,9% (da 4,278 młrd dalaraŭ), vyručka ad akazańnia pasłuh — na 28,2% (da 524,3 młn dalaraŭ). Valutnaja vyručka, što pastupiła z krain SND, skłała 2,214 młrd dalaraŭ, z krain za miežami SND — 2,647 młrd dalaraŭ.

AH, afn.by, belta.by, interfax.by

• 0
• 0
• 0
• 0
• 0
• 0
• 0
• 0