Novyja dyski

«Saša i Siroža», Alaksiej Chlastoŭ.

Ska-ty!

«Saša i Siroža», «Go Records», 2005

Na dysku, mienskaja prezentacyja jakoha była zabaronienaja na tym tydni, — 14 piesień z muzyčnaha darobku Sašy i Sirožy. Stylistyka albomu — vuličny falklor. Tematyka raniejšaja, tolki słovy inšyja. Niekali ŭ «Nadzieńcy» žanaty vajskoviec padmanuŭ naiŭnuju dziaŭčynu, a ŭ «Paskudzie» ŭsio naadvarot — pakryŭdžanym apynuŭsia budaŭnik («Na šabaškach ja kłaŭ šyfer, a ty kłała na žyźń maju»). Liryčnyja hieroi Sašy i Sirožy mohuć vyklikać zamiłavańnie: choć u ich «vaniajuć naski», jany zdolnyja kachać, «vładziejuć pasacižami», nia lubiać papsu i šanujuć radzimu. U niekatorych momantach varta da ich uvažliva prysłuchacca: «Kab luboŭ zasłužyć, nužna brosić pić!» Tema kachańnia — centralnaja ŭ tvorčaści Sašy i Sirožy. Jak na ich dumku, to pašencić u kachańni moža navat niamohłamu «ačkaryku», nia kažučy ŭžo pra chłopcaŭ, jakija zajmajucca łyžami i ŭmiejuć lapić katlety.

Udała ŭpisałasia mienskaja rakabili-hrupa «Meteor», jakaja padyhrała Sašu i Sirožu. Atrymalisia ściobnyja rok-n-rolnyja častuški-pokazki. Na dysku taksama možna znajści dva klipy «SiS» — «Kałychanku» i «Pra Filu». Apošni — z pradusaram «Dziaciej Sonca» Vitalem Drazdovym u roli «čałavieka, jaki duža nahadvaje Pilipa Kirkorava», — admovilisia brać u ratacyju biełaruskija i niekatoryja ŭkrainskija telekanały.

Uvaha: śpieta naŭmysna niaroŭnymi hałasami!

Vorvaťsia v niebo

Alaksiej Chlastoŭ, TDA «Vest-rekards-plus», 2005

Chlastoŭ — heta ŭžo nie Saładucha, ale jašče nie Antonaŭ. U piesiennaj maniery Chlastova niama taho saładušnaha patasu, adnak nie staje jašče antonaŭskaj ščyraści. Ale pieśni novaha hieroja-adzinočki biełaruskaj estrady karystajucca šalonym pośpiecham — proma-dyski «pasypalisia» ad uzmocnienych ratacyj na FM-stancyjach, dziaŭčaty vystrojvajucca ŭ čarhu pa kvitok na kancert Chlastova ŭ Pałacy Respubliki. Na maksi-synhle sabranyja piać hałoŭnych hitoŭ Chlastova plus bonus — «Vorvaťsia v niebo» ŭžyvuju pad akampanement hitarysta Ancišyna i bubnača Ševando (samaja smačnaja častka!).

Chlastoŭ zadziejničaŭ dobrych tekstavikoŭ, kampazytaraŭ i muzykaŭ (napr. Lavon Šyryn, Siarhiej Truchanovič). Hitaryst «Kramy» padyhraŭ u pieśni «Okiean tajhi» — baladzie a-la «Lube». Chlastoŭ tak dušeŭna śpiavaje pra «taježnyja sny», nibyta chadziŭ pa «tropuškam» toj tajhi bolšuju častku svajho žyćcia. Pieśni zapaminalnyja, navat naviaźlivyja — klavišny projhryš z «Vorvaťsia v niebo» jašče doŭha budzie pieraśledavać paśla prasłuchoŭvańnia. Zamirajem u čakańni «vialikaha albomu».

• 0
• 0
• 0
• 0
• 0
• 0
• 0
• 0