Maskva prysłała padkrapleńnie: Biełaruś atrymaje čarhovyja $440 miljonaŭ ad JeŭrAzES
Zastałosia ŭziać jašče dva tranšy ŭ nastupnym hodzie.
Saviet Antykryzisnaha fondu JeŭrAzES 7 śniežnia na pasiadžeńni ŭ Minsku ŭchvaliŭ vydzialeńnie Biełarusi čarhovaha tranša kredytu ŭ $440 miljonaŭ. Pra heta paviedamiŭ ministr finansaŭ Rasii Anton Siłuanaŭ.
«Rašeńnie pryniata stanoŭčaje. My miarkujem, što ŭsie nieabchodnyja dakumienty dla jaho pryniaćcia byli padrychtavanyja», — skazaŭ jon.
Pry hetym rasijski ministr zajaviŭ, što nie varta źviazvać hetaje rašeńnie z palityčnymi momantami:
«Mahu vas zapeŭnić, što nijakaj palityki nie było. Heta čystaja ekanomika».
Pavodle słoŭ Siłuanava, uvieś pieralik mierapryjemstvaŭ, praduhledžanych dla vydzialeńnia čaćviortaha tranša kredytu, vykanany. Asobnyja pakazčyki byli adkarektavanyja, zaznačyŭ jon.
Pry pryniaćci rašeńnia vykanańnie Biełaruśsiu pakazčykaŭ pa pryvatyzacyi dziaržułasnaści na 2,5 młrd. dołaraŭ nie było vyznačalnym, zajaviŭ kiraŭnik Minfina RF.
«Pytańnie pryvatyzacyi — heta pytańnie čarhovaha etapu realizacyi prahramy. Budziem jaho razhladać u nastupnym hodzie», — skazaŭ ministr.
Adkazvajučy na pytańnie pra terminy pieraličeńnia ŭ Biełaruś čarhovaha tranša, Siłujanaŭ zajaviŭ, što «hrošy pastupiać u najbližejšym časie».
Pahadnieńnie pamiž Biełaruśsiu i Jeŭrazijskim bankam raźvićcia (JEABR), jaki kiruje srodkami AKF JeŭrAzES, pa vydzialeńni kredytu na 3 młrd. dołaraŭ šaściu tranšami było padpisana 9 červienia 2011 hoda.Pieršy tranš na 800 młn. dołaraŭ byŭ pieraličany ŭ Biełaruś 21 červienia 2011 hoda, jašče 440 młn. dołaraŭ — u śniežni
U 2012 hodzie Biełaruś pavinna atrymać dva tranšy pa 440 młn. dołaraŭ kožny. Treci tranš byŭ atrymany ŭ červieni i zaličany ŭ zołatavalutnyja reziervy krainy. U červieni namieśnik ministra finansaŭ RF Siarhiej Starčak vykazaŭ mierkavańnie, što Biełaruś maje ŭsie šancy da kanca hoda atrymać čaćviorty tranš.
Atrymańnie hetych srodkaŭ zdymaje patrebu terminovych pieramovaŭ z MVF. Cikava, što kredyt vydzialajecca, niahledziačy na toj fakt, što ŭmovy prahramy Biełaruśsiu nie spoŭnienyja. U pryvatnaści, Minsk nie atrymaŭ u 2012-m ad pryvatyzacyi 2,5 młrd dalaraŭ, jak taho praduhledžvała damova, padpisanaja ŭ 2011 hodzie.
Ciapier čytajuć
Zialenski nazvaŭ, jakija retranślatary na miažy i biełaruskija pradpryjemstvy chvalujuć Ukrainu45
Kamientary