Porsche Cayenne, Chevrolet Tahoe, BMW X6 – jakija jašče aŭtamabili ŭ haražy KDB?
Na adnym z aficyjnych sajtaŭ nakont dziaržaŭnych zakupak źjaviŭsia aŭkcyjon u akazańni pasłuhaŭ KDB. «Kamitetčyki» šukajuć pastaŭnikoŭ aŭtazapčastak. Ź pieraliku pradmietaŭ zakupki možna zrabić vysnovu, jakija mašyny jość u haražy KDB ci, prynamsi, jakija ź ich patrabujuć ramontu.
Zajaŭku na aŭkcyjon padali ad dziaržaŭnaj ustanovy «Haraž apieratyŭnaha pryznačeńnia KDB RB». Mierkavany košt zakupak – Br 1 młrd.
Darahija i mocnyja
Siarod aŭtaŭ, jakija zhadvajucca ŭ łotach aŭkcyjonu, jość i adnosna novyja, darahija mašyny. Naprykład, krasovier BMW X6 2010 hoda z ruchavikom 4,4 litry. Hetaje aŭta nie jość paŭnavartasnym pazadarožnikam, a tamu pra vykanańnie apieratyŭnych zadańniaŭ u kiepskich darožnych umovach havorki nie moža iści. Sam kancern «BMW» pazicyjanuje hetaje aŭta jak «spartovaje kupe dla aktyŭnaha adpačynku».
Jość u haražy KDB i paŭnavartasny pazadarožnik – Cadillac Escalade z 6-litrovym ruchavikom. Choć aŭta i adnosna staroje (2001 h. v.), hetaja madel – z šerahu luksavych darahich aŭtaŭ, što i praz šmat hadoŭ paśla vypusku zastajucca nie samymi tannymi. Jość u haražy jašče dva kłasičnych «amierykancy» – Chevrolet Tahoe (2008 h. v.), jaki charaktaryzujecca «vytančanym adštukavańniem» sałonu, dy Chevrolet Suburban – samy vialiki amierykanski pazadarožnik, što, miž inšaha, uvachodzić u prezidencki kartež Abamy. Siarod aŭtaŭ-lehiendaŭ – Jeep Cherokee (1995 h. v.), jaki byŭ hetak papularny ŭ bandytaŭ naprykancy 1990-ch.
Taksama pradstaŭniča vyhladajuć Lexus GX 470, Lexus RX 330 dy Porsche Cayenne. Prynamsi nazvać ich niezaŭvažnymi – ciažka.
«Narodnyja aŭty» dla apieratyŭnikaŭ
Aproč šykoŭnych i darahich aŭtaŭ, u łotach zhadvajucca i bolš «demakratyčnyja» madeli. Heta niekalki aŭtaŭ Opel, što syšli z kanviejeraŭ jašče da 2000 hoda, ź dziasiatak Volkswagen'aŭ (u tym liku mikraaŭtobusy) dy čatyry Ford'y. Hetyja aŭty sapraŭdy nadajucca da apieratyŭnaj pracy, kali pravaachoŭnikam nie treba vyłučacca na darozie.
Jość u haražy KDB aŭty rasiejskaj vytvorčaści – «Vołhi» dy «VAZy».
Ciapier čytajuć
«Biada, na vialiki žal, užo stupaje na paroh Siniavokaj». Ultymatum Zialenskaha Łukašenku: što budzie dalej?66
Kamientary