U «Mart In» rekłamnyja buklety zroblenyja pa-biełarusku.
«Tuška kuraniaci-brojlera, šali padłohavyja, vypramnik dla vałasoŭ» — heta nie dapamožnik pa biełaruskaj movie z malunkami, a rekłamny buklet sietki supiermarkietaŭ «Mart In». Što heta: markietynhavy chod ci prajava patryjatyzmu?
«Nie sakret, što častka našych inviestaraŭ — litoŭcy. Pieršaje, što jany ŭ nas spytali, — na jakoj movie my razmaŭlajem, ci razmaŭlajem pa-biełarusku», — kaža mieniedžar pa kamunikacyjach Alena Sitdzikava.
Litoŭcy razumiejuć, što bolšaść biełarusaŭ u žyćci havorać pa-rasiejsku. Ale biełaruskaja — druhaja dziaržaŭnaja. Jak vietlivyja hości, litoŭcy vyrašyli, što jaje vykarystańnie budzie dobrym chodam, pavahaj da krainy, u jakoj jany źbirajucca raźvivać biznes.
«A taksama — što chavać — nichto bolš pra hetaha nie zdahadaŭsia. Usie astatnija sietki kamunikujuć na ruskaj movie, nie vykarystoŭvajučy biełaruskuju jak srodak adroźnieńnia. Tamu my z zadavalnieńniem zrabili biełaruskuju movu našaj admietnaj rysaj», — dadaje Alena. Jana ž i zajmałasia pierakładam.
Naturalna, časam zdarajucca pamyłki. Naprykład, adzin pilny žychar Bresta paraiŭ zamianić «kufal» na «kielich» u rekłamnym buklecie. «Liču, što lepš tak, čym anijak. My vučymsia razam z tymi, chto naviedvaje našy kramy», — kaža dziaŭčyna.
Pakupniki dy biznes-partniory ideju «biełarusizacyi» «Mart Ina» ŭspryniali pazityŭna.
Prablemy z razumieńniem słovaŭ ni ŭ kaho nie ŭźnikali. Zrešty, hałoŭnuju infarmacyju dla pakupnikoŭ — ceńniki — u kramie vyrašyli pakinuć pa-rasijsku.
«Tamu pakul što biełaruskaja — heta rekłamnyja listoŭki i afarmleńnie interjera.
To bok toje, što nie vykliča dyskamfort u ludziej u pracesie vybaru», — dadaje Alena.
Na jaje dumku, całkam pierajści na biełaruskuju ŭdasca, tolki kali ŭsie kamunikacyi ŭ biełaruskim hramadstvie pačnucca na rodnaj movie. Tady choćki-niachoćki ludzi pačnuć razumieć, pryvykać, adaptavacca i karystacca. Niejkaja ž ideałahičnaja praca ci zakliki da patryjatyzmu naŭrad ci spracujuć.
Mart In
Pieršy «Mart In» (vymaŭlajecca «marcin») adčyniŭsia ŭ žniŭni 2012 u Minsku. Ciapier pracujuć dźvie kramy ŭ stalicy, jašče pa adnoj — u Breście, Babrujsku i Žodzina. Sioleta płanujecca adkryć kala 10 novych kramaŭ u Vaŭkavysku, Babrujsku, Homieli, Breście i Salihorsku. Uładalniki — litoŭskija biznesmeny braty Mindaŭhas i Hintaras Marcinkiavičusy, jakija taksama vałodajuć dolaj akcyi sietki «Maksima».
Kamientary