Irakskija isłamisty, jakija zachapili harady Masuł i Tykryt i jakija ŭziali ŭ zakładniki tureckich dypłamataŭ, majuć namier zaniać stalicu krainy Bahdad.
Tykryt — heta radzima Sadama Chusejna, a Masuł — dvuchmiljonny centr.
Pradstaŭnik hrupoŭki «Isłamskaja dziaržava Iraka i Levanta» (IDIŁ), jakaja staić za napadami na harady paŭnočnaha Iraka, zaklikaŭ bajevikoŭ zachapić Bahdad. «Bitva jašče nie bušuje, ale budzie bušavać u Bahdadzie i Kierbiele», — havorycca ŭ audyjopasłańni, raźmieščanym u Twitter IDIŁ.
«Isłamskaja dziaržava Iraka i Levanta» — heta arhanizacyja, što paŭstała na asnovie irakskich supołak «Al-Kajdy». Jaje bajcy vajavali ŭ Siryi suprać siłaŭ Bašara Asada. U Iraku raniej jana viała terarystyčnuju dziejnaść. Zachop joju terytoryju staŭ niečakanaściu dla irakskich siłavikoŭ.
Bajeviki IDIŁ vyłučajucca žorstkaściu i nieciarpimaściu da inšaviercaŭ i «zdradnikaŭ viery». Mienavita na jaje rukach kroŭ u bolšaści vypadkaŭ masavych zabojstvaŭu Siryi.
Zaklik da isłamistaŭ byŭ abnarodavany paśla taho, jak u sieradu, 11 červienia, bajeviki «Isłamskaj dziaržavy Iraka i Levanta» zachapili horad Tykryt, jaki znachodzicca na poŭnačy krainy ŭ 140 kiłamietrach ad Bahdada. Raniej pad kantrol ekstremistaŭ pierajšoŭ centr paŭnočnaj irakskaj pravincyi Ninievija — horad Masuł. Taksama byli zachoplenyja niekatoryja nasielenyja punkty, raźmieščanyja ŭ pravincyjach Sałach-ed-Dzin i Kirkuk.
U pałon da bajevikoŭ, jakija imknucca stvaryć isłamskuju dziaržavu na terytoryi Iraka i Siryi, trapili mnostva irakskich vajskoŭcaŭ, jakija praktyčna nie akazvali supracivu.
IDIŁ pajadnoŭvaje sunitaŭ, a jany składajuć tolki 20% nasielnictva Iraka. Tamu šancaŭ zaniać usiu krainu IDIŁ nie maje. Adnak jana moža stvaryć vialikija prablemy rehijanalnaha płana. Užo siońnia IDIŁ kantraluje amal usiu zasielenuju sunitami pravincyju Ninievija. Siarod inšaha, jany zaniali horad Baidžy, dzie mieścicca najbolšy ŭ krainie naftapierapracoŭčy zavod. Heta pryviało da rostu cenaŭ na naftu ŭ śviecie vyšej za 110 dalaraŭ.
Ciapier čytajuć
U 2021 hodzie vypusknica admoviłasia pacisnuć ruku Hihinu na ŭručeńni dypłoma. Ciapier BDU nie choča jaho paćviardžać5
Kamientary