Babkina zaśpiavaje pa-biełarusku?

Najlepšyja biełaruskamoŭnyja piesni minułaha hoda patrapiać da słuchača na adnym dysku — u składzie «Premjer Tuzin‑2007». 42 biełaruskamoŭnyja kampazicyi byli adabranyja padčas hałasavańnia, što adbyvałasia na praciahu hoda na muzyčnym partale «Tuzin Hitoŭ».

U «załaty tuzin» tradycyjna ŭvajšli novyja chity rokavych hrup «N.R.M.» (darečy, ich pieśnia «Miensk‑Minsk» była pryznana pieśniaj hoda na «Tuzinie»), «Krama», «ZJeT», «IQ48». Niekatoraj niečakanaściu staŭ vychad u lik «finalistaŭ» bluzavaj kamandy «NJeSTARy Band», art‑folkavaj «OSIMIRA» i hurta «Band A». Pavodle mierkavańnia słuchačoŭ, vartymi pieršaj «dvanaccatki» stali tajamničaja kamanda Piatra Jełfimava «RitBull», siaredniaviečny «Rokaš», a jašče biarozaŭski «:B:N:», mahiloŭski «Tav.Mauzier» i homielski «Ban‑Žvirba». Druhuju siekcyju «Premjer Tuzinu» (farmat mr3) skłali 30 najbolš cikavych piesień z chit‑parada.

Za čatyry hady pracy «Tuzina Hitoŭ» na jaho Internet‑staronkach było pradstaŭlena bolš za 300 novych biełaruskich piesień. Ciapierašni skład — treciaja «piesiennaja spravazdača» partała.

Muzykant Aleh Chamienka padčas prezientacyi «Premjer Tuzina‑2007» adznačyŭ, što na papiarednich dyskach ahulnaja tanalnaść kampazicyj depresiŭna‑pratestnaja, na novym bolš tvoraŭ zadumliva‑fiłasofskich. Jość tut i viasioła‑ściobnyja piesni, jak narodna‑kaŭbojskaja «Sok‑sok‑sok» ad hurta «Rietie‑Raff» ci złabadzionnaja «Krynica ciapła» — oda hazavaj trubie ad «UltraVožyk», jość rečy nadzvyčaj paetyčnyja («Leta» A. Kamockaha, «Horad» V. Šałkieviča)…

Strakataść nie tolki ŭ nastroi, ale i ŭ muzyčnym kirunku, jakoha prytrymlivajucca vykanaŭcy — daminuje «ciažki» rok, sustrakajecca rep (SRV), a‑kapelny folk (Samierata), etničnyja napievy (Džambibum) dy inš. Pop‑vykanaŭcy taksama nie zastanucca pa‑za ŭvahaj, varta im tolki niabłaha praśpiavać pa‑biełarusku — tak, u skład 2005 hoda patrapili «Alaksandra i Kanstancin» ź pieśniaj «Du‑du da‑da» i «J:Mors» ź pieśniaj «Hladzi», u 2006 A&K znoŭ spadabalisia słuchačam (narodnaju «A dzie była vulica»).

U hetym hodzie nišu «papularnych» zajmaje pieśnia Anžaliki Ahurbaš «Vianok» — pavodle słoŭ administrataraŭ sajta, jana mieła niebłahija pazicyi ŭ chit‑paradzie na praciahu niekalkich tydniaŭ.

Toje, što na hałasavańnie mohuć vystavić svaju pieśniu ŭsie achvotniki, adpaviadaje idei zasnavalnikaŭ partała — prapahandavać ajčynnuju biełaruskamoŭnuju muzyku. Dziela hetaha «Tuzin Hitoŭ» zajmieŭ najbujniejšy lehalny sieciŭny katałoh biełaruskamoŭnych piesień u farmacie MR3, ź jakoha štomiesiac fiksujecca kala 50 000 skačvańniaŭ trekaŭ, hetyja piesni hučać u radyjoefiry. Na sajcie možna znajsci naviny z muzyčnaha žyćcia krainy, a kali dadać siudy źmieščanyja tam ža kala 100 recenzij na navinki, dyk atrymajecca ci nie poŭny žyćciapis sučasnaj ajčynnaj alternatyŭnaj muzyki.

Nakolki abjektyŭnymi stali vyniki hałasavańnia, vy možacie ŭpeŭnicca sami — «Premjer Tuzin‑2007» užo ŭ prodažy. Arhanizatary TH pryznajucca — niahledziačy na isnavańnie admysłovych miechanizmaŭ zabieśpiačeńnia dobrasumlennaha hałasavańnia, biez parušeńniaŭ nie abychodzicca ni dnia. Isnujuć navat spisy samych aktyŭnych amataraŭ prahałasavać za adnu pieśniu bolš jak raz na sutki.

Analizujučy razvićcio biełaruskamoŭnaj muzyki za apošnija hady, Aleh Chamienka pa našaj prośbie pasprabavaŭ sprahnazavać jaje budučyniu. Na jaho dumku, aktyŭnaja papularyzacyja muzyki farmatu TH pryviadzie da taho, što biełaruskim ruskamoŭnym muzykantam taksama zachočacca śpiavać na rodnaj movie.

Pryvabić biełaruskaja mova i vykanaŭcaŭ z susiednich krain — pavodle infarmacyi spadara Chamienki, cikaŭnaść jość u polskich i rasijskich kamandaŭ, a Nadzieja Babkina navat užo viadzie ź biełarusami adpaviednyja pieramovy.

Pavodle: Marharyta Alaškievič, «Źviazda»

Fota z sajtu babkina.ru

• 0
• 0
• 0
• 0
• 0
• 0
• 0
• 0