Arsień Sivicki: Maskva rychtuje ŭkrainski varyjant dla Biełarusi, začepkaj moža stać admova raźmiaścić avijabazu

Infarmacyja pra toje, što ŭrad Rasiei ŭchvaliŭ prajekt pahadnieńnia ź Biełaruśsiu ab raźmiaščeńni na biełaruskaj terytoryi rasiejskaj vajskovaj avijacyjnaj bazy nia vyklikała nijakaj reakcyi ŭ aficyjnaha Miensku. I dziaržaŭnyja medyi zrabili vyhlad, što nie zaŭvažyli takoj, zdavałasia b, važnaj padziei. Čamu ž tak?

U interviju radyjo «Svaboda» kiraŭnik biełaruskaha Centru stratehičnych i zamiežnapalityčnych daśledavańniaŭ Arsień Sivicki tłumačyć, čamu pytańnie rasiejskaj avijabazy — pravierka Łukašenki na lajalnaść i čamu Maskva hatovaja pajści na destabilizacyju sytuacyi ŭ Biełarusi.

— Na minułym tydni biełaruskaja hramadzkaść horača abmiarkoŭvała infarmacyju pra toje, što ŭrad Rasiei razhledzieŭ prajekt pahadnieńnia ź Biełaruśsiu ab raźmiaščeńni tut rasiejskaj vajskovaj avijacyjnaj bazy. Čym možna patłumačyć toje, što Maskva znoŭ aktyvizavała hetaje pytańnie i patrabuje ad Biełarusi vyznačycca ŭ hetaj temie?

«Heta pravierka Łukašenki na lajalnaść»

— Na maju dumku, heta sproba rasiejskaha kiraŭnictva ŭciahnuć Biełaruś u tak zvanuju novuju «chałodnuju vajnu» pamiž Rasiejaj i Zachadam. Pa sutnaści, heta pravierka na lajalnaść Alaksandra Łukašenki. Hetaja tema nievypadkova źjaviłasia pierad prezydenckimi vybarami, bo, z punktu hledžańnia niekatorych rasiejskich palityčnych elitaŭ, ciapier nastupiŭ «čas iks» dla kiraŭnika Biełarusi, kab toj vyznačyŭsia kančatkova, na jakim baku jon hulaje.

Niahledziačy na toje, što biełaruskaje vajskova-palityčnaje kiraŭnictva vielmi vyrazna dasyłała Maskvie mesydžy, što ciapier nia toj čas, kab abmiarkoŭvać pytańnie avijabazy — Rasieja sprabuje prasoŭvać hetuju temu ŭ dvuchbakovy paradak dnia. I, mnie zdajecca, heta źviazana z tym, što Maskvie nia vielmi padabajucca tyja dyvidendy, jakija Łukašenka atrymlivaje ŭ novym hieapalityčnym kantekście, vystupajučy z pazycyi neŭtralnaści ŭ hetym kryzisie. Bo Łukašenka nia raz zajaŭlaŭ, što niemahčyma ŭvarvańnie na Ŭkrainu vojskaŭ trecich krainaŭ z terytoryi Biełarusi. I my razumiejem, što hetyja harantyi majuć značeńnie nia tolki dla Ŭkrainy, ale i dla ŭsiaho rehijonu. Bo mahčymaja vajskovaja hrupoŭka Rasiei ŭ Biełarusi moža pahražać nia tolki Ŭkrainie, ale i bałtyjskim i centralnaeŭrapiejskim krainam.

— Aficyjnaja Rasieja jak nikoli rana zajaviła pra svaju padtrymku Łukašenki na prezydenckich vybarach. Niaŭžo ŭ Kramli nie razumiejuć, što ŭzdymańnie temy rasiejskaj bazy Łukašenku tolki paškodzić, tamu što bolšaja častka biełarusaŭ vidavočna suprać zamiežnych bazaŭ?

«Maskva viadzie hulniu na stvareńnie ŭ Biełarusi ŭnutrypalityčnaha kryzisu»

— U Kramli ŭsio razumiejuć, usie nastupstvy padpisańnia pahadnieńnia ab stvareńni rasiejskaj bazy. 45 pracentaŭ biełaruskich hramadzianaŭ staviacca da hetaj idei vielmi nehatyŭna. Pa sutnaści, Maskva viadzie hulniu na stvareńnie ŭnutrypalityčnaha kryzisu ŭ Biełarusi, jaki moža pačacca ŭ toj momant, kali budzie pryniata ci nie pryniata hetaje rašeńnie.

Kali jano nia budzie pryniata, to heta, vidavočna, pavialičyć cisk z boku Maskvy. I hety cisk moža być nia tolki handlova-ekanamičny, jak u 2010 hodzie, kali Łukašenka doŭhi čas nie pahadžaŭsia padpisvać Mytny Kodeks.

Hetym razam jość pahroza vajenna-palityčnaha cisku na Biełaruś.

Niekatoryja koły ŭ Kramli ŭsprymajuć «razvarot» Biełarusi na Zachad i ŭmacavańnie supracoŭnictva z Kitajem jak źmianšeńnie ŭpłyvu Rasiei ŭ Biełarusi. Pa sutnaści, heta adpaviadaje toj sytuacyi ŭ 2013 hodzie, kali Ŭkraina išła na ŭzmacnieńnie supracoŭnictva i z Zachadam, i z Kitajem. I, mnie zdajecca, takim samym čynam hrupa hetak zvanych «chardłajneraŭ» u Kramli ŭsprymaje toje, što adbyvajecca ciapier u Biełarusi — jak pahrozu dla ŭpłyvu Rasiei. I tamu adziny krok, na ich dumku, jaki b zamacavaŭ Biełaruś u sfery ŭpłyvu Rasiei — heta było b razhortvańnie tut stałaj vajskovaj prysutnaści.

— Jak daloka Maskva moža zajści ŭ svaich sprobach destabilizavać sytuacyju ŭ Biełarusi? Raniej Kreml čaściej tolki «tuzaŭ» Łukašenku, ale nie rabiŭ rašučych krokaŭ, kab jaho zrynuć.

— Vy raniej kazali, što Rasieja ŭžo vykazała svaju padtrymku Łukašenki na vybarach, ale ja b tut nie pahadziŭsia. Bo raniej zaŭsiody svaju padtrymku Maskva vykazvała ŭ ekanamičnaj formie. A ciapier Biełaruś užo niekalki razoŭ prasiła ab vydzialeńni novaha stabilizacyjnaha kredytu, ale Maskva kožny raz admaŭlała. Tamu Rasieja padtrymlivaje tolki rytaryčna. Ale pa fakcie my hetaj padtrymki nie nazirajem. I

kali kazać, nakolki daloka Rasieja moža pajści ŭ cisku na Biełaruś — to my tut nia možam vyklučać nijakich varyjantaŭ, asabliva paśla krymskaha kryzisu. Adziny instrument utrymlivańnia Biełarusi ŭ svajoj sfery ŭpłyvu — destabilizacyja vajenna-palityčnaha stanovišča, jak heta było ŭ vypadku z Ukrainaj

U Rasiei abjektyŭna siońnia niama niejkaha pazytyŭnaha paradku dnia, kab uciahvać Biełaruś u svaje intehracyjnyja prajekty. U Rasiei niama resursaŭ, kab vykonvać svaje abiacańni ŭ miežach EŭrAzES. Tamu adziny instrument utrymlivańnia Biełarusi ŭ svajoj sfery ŭpłyvu — destabilizacyja vajenna-palityčnaha stanovišča, jak heta było ŭ vypadku z Ukrainaj. Kanflikt u Danbasie — heta vielmi spryjalny instrument, kab nie davać Ukrainie iści dalej na Zachad, intehravacca ŭ eŭraatlantyčnyja struktury, pazbavić intaresu da jaje z boku Kitaja jak da źviana novaha «šaŭkovaha šlachu». Tamu zdajecca, što Rasieja pierachodzić da novaha typu kiravańnia ŭ postsavieckaj prastory.

— Mahčyma, biełaruskaja ŭłada ŭsprymaje heta nia tak dramatyčna, jak vy, ci nia vieryć u namalavanyja vami scenary. Tym nia mienš — jakija varyjanty reahavańnia jość u Alaksandra Łukašenki? Spuścić spravu avijabazy na tarmazach ci aktyŭna niejak hetamu supraćstajać?

— Mnie zdajecca, što da prezydenckich vybaraŭ hetaje pytańnie vyrašana nia budzie. Navat kali Ŭładzimier Pucin padpiša hetaje pahadnieńnie, praź niekalki tydniaŭ.

Mnie zdajecca, što vialikich dobrych opcyjaŭ dla Alaksandra Łukašenki ŭžo niama. Usie razumiejuć, što kali hetaje pahadnieńnie budzie padpisana, to nastupnym krokam dla Łukašenki budzie prapanova ab stvareńni suchaputnaj bazy tut. I jość śviedčańni, što hetaje pytańnie ŭžo znachodzicca na paradku dnia ŭ rasiejskaha Hieneralnaha štabu.

Zrazumieła, što pavieličeńnie rasiejskaj vajennaj prysutnaści tut budzie ŭ tym liku i pahražać uładzie Łukašenki. Tamu

mnie zdajecca, što ŭsia hetaja sytuacyja nakiravanaja na toje, kab spravakavać kryzis u biełaruska-rasiejskich adnosinach, kab stvaryć padstavy dla bolš žorstkich krokaŭ z boku Kramla

adnosna Łukašenki, abvinavacić jaho ŭ zdradnictvie, što jon nie vystupaje na baku Rasiei ŭ novaj «chałodnaj vajnie».

Pa sutnaści, heta pytańnie samavyznačeńnia dla Alaksandra Łukašenki, dla ŭsioj Biełarusi i jaje suverenitetu.

• 0
• 0
• 0
• 0
• 0
• 0
• 0
• 0