Na pasiadžeńni ŭ Danieckim harsudzie Rastoŭskaj vobłaści ŭkrainskaja lotčyca Nadzieja Saŭčanka praciahvaje raspaviadać, što było ź joj u pałonie.
Pra heta paviedamlaje ŭ svaim Twitter advakat Mikałaj Połazaŭ.
«U pałonie 17.06 pryjšoŭ «asabist», pakazaŭ proźvišča aficera USU, skazaŭ jon navodčyk. Ja skazała, nie treba jaho šukać. Hety aficer USU na voli i moža vykanać zadańnie, a ja ŭ pałonie — hublać niama čaho. Ja skazała, što navodčyk nie jon, a ja. Uviečary 17.06 pałonnych bili, mianie nie čapali, skazali «na zakusku pakiniem». Potym pryjšoŭ lekar, pieraviazaŭ pałonnych. Pieryjadyčna prychodziŭ «asabist» Kałamijec (toj, chto siabra Mańšyna). Kazaŭ, prahinacca pad RF, ciabie chutka tudy addaduć», — pierakazvaje Połazaŭ Saŭčanka.
Dalej jana padrabiaźniej raspaviała, jak bajeviki schilali jaje da supracoŭnictva: «Prychodzili asabist Hromaŭ (jon potym pamior) i Adam Umaraŭ - jon davaŭ mnie patelefanavać z majho telefona siastry. Jašče prychodziŭ asabist Karakin, pavodziŭ siabie nachabna, pahražaŭ. Patrabavaŭ pieradać vajennuju infarmacyju».
Umaraŭ, pa słovach Saŭčanka, ujaŭlaŭsia «kamandziram čačenskaha bataljona, vychvalaŭsia, što źbiŭ samalot USU». Hromaŭ kazaŭ joj, što jon «pieramoŭščyk ad Łuhanska, jak Ruban z druhoha boku». Kałamijec, «podła uśmichajučysia», pahražaŭ, što ŭžo ŭsio vyrašana i Saŭčanka «pajedzie ŭ Mahadan».
U rešcie rešt Hromaŭ i Kałamijec dakładna skazali, što jaje «vyviezuć u Rasiju».
Tak i zdaryłasia: «23 červienia mianie vyvieźli z Łuhanska ŭ napramku Daniecka. U hety momant ja zrazumieła — mnie kryška, vyvoziać z Ukrainy».
***
Nahadajem, rasijskaje śledstva abvinavačvaje Saŭčanka pa artykułach «zabojstva» i «zamach na zabojstva». Ukrainka ŭsie abvinavačvańni admaŭlaje. Nasamreč paśla zachopu ŭ pałon bajevikami jana była pierapraŭlena na terytoryju Rasii. Nadzieja Saŭčanka abviaściła haładoŭku 18 śniežnia paśla taho, jak byŭ padoŭžany termin jaho ŭtrymańnia pad vartaj.
Kamientary