Aŭstryja vystupaje za admienu sankcyj ES u dačynieńni da Biełarusi, zajaviŭ hienieralny sakratar MZS hetaj krainy Michael Linchart, razmaŭlajučy z žurnalistami na cyrymonii adkryćcia aŭstryjskaha pasolstva ŭ Minsku 9 lutaha.
«U Brusieli ciapier idzie dyskusija. Aŭstryja vystupaje za admienu, my na baku Biełarusi. Spadziajusia, ruch budzie mienavita ŭ hety bok», — skazaŭ dypłamat.
Pa słovach Lincharta, Biełaruś zrabiła vielmi šmat važnych krokaŭ. «Byŭ pakazany prahres, u pryvatnaści mahu adznačyć śfieru pravoŭ čałavieka. Hetym i tłumačycca pazicyja Aŭstryi», — zajaviŭ jon.
Na pytańnie, pra jaki mienavita prahres idzie havorka, Linchart nazvaŭ vyzvaleńnie palitźniavolenych, dyjałoh pa pravach čałavieka pamiž Biełaruśsiu i ES, a taksama niadaŭni vizit u Minsk dyrektara BDIPČ ABSIE Hieorha Linka.
«Nazirajecca ceły šerah padziej, jakija nastrojvajuć nas pazityŭna. Nieabchodna pracavać dalej, tamu my vystupajem za admienu sankcyi», — skazaŭ aŭstryjski dypłamat.
Na pytańnie, ci ličyć aficyjnaja Viena, što apošnija prezidenckija vybary ŭ Biełarusi adroźnivalisia ad vybaraŭ 2010, 2006 i 2001 hadoŭ, Linchart zajaviŭ: «Vysnovy naziralnikaŭ vam viadomyja. My kanstatujem, što byŭ peŭny prahres. Čakajem, što nastupnyja vybary (parłamienckija) projduć u adpaviednaści z našymi čakańniami».
Kamientary