Specdakładčyk PARE zaklikaŭ Biełaruś uvieści maratoryj na pakarańnie śmierciu

«Ja zaklikaju vas stać pieršaprachodcami na šlachu ŭviadzieńnia maratoryja na pakarańnie śmierciu ŭ Biełarusi jak pramiežkavaha kroku ŭ kirunku poŭnaha jaho admieny», — havorycca ŭ adkrytym liście dakładčyka Parłamienckaj asamblei Rady Jeŭropy (PARIE) Andrea Ryhoni na imia staršyni Pałaty pradstaŭnikoŭ Vadzima Papova i staršyni Savieta Respubliki Hienadzia Navickaha, paviedamlaje pres‑słužba PASIE.

A.Ryhoni padkreśliŭ, što Biełaruś źjaŭlajecca adzinaj krainaj u Jeŭropie, dzie dahetul zachoŭvajecca pakarańnie śmierciu.

«Kožnaje pakarańnie śmierciu — heta ŭžo samo pa sabie zanadta šmat, — zaznačajecca ŭ liście. — Jakim žudasnym ni było b učynienaje złačynstva, jakimi biassprečnymi ni byli b dokazy viny, ništo nie moža apraŭdać zabojstva čałavieka dziaržavaj».

Deputat zajaviŭ: jon hanarycca tym faktam, što ŭ italjanskaj vobłaści Taskana, adkul jon rodam, pakarańnie śmierciu było admieniena jašče ŭ 1786 hodzie.

«Hetaje rašeńnie tłumačycca tym, što vyšejšaja miera pakarańnia amaralnaja, jana nie praduhledžvaje mahčymaści pieravychavańnia pravaparušalnika ŭ hramadstvie, nie ŭtrymlivaje ludziej ad učynieńnia takich złačynstvaŭ. Akramia taho, pryviadzieńnie ŭ vykanańnie vyšejšaj miery niezvarotnaje i nie padlahaje vypraŭleńniu ŭ vypadku sudovaj pamyłki», — padkreśliŭ A. Ryhoni.

Jon zaznačyŭ, što na refierendumie 1996 hoda hramadzianie Biełarusi vykazalisia za vyšejšuju mieru pakarańnia. Adnak, padkreślivaje A. Ryhoni, u 2004 hodzie Kanstytucyjny sud krainy pravioŭ pracu pa acency adpaviednaści Kanstytucyi pałažeńniaŭ ab pakarańni śmierciu, jakija ŭtrymlivajucca ŭ Kryminalnym kodeksie. «Sud pryjšoŭ da zaklučeńnia, što šerah pałažeńniaŭ Kryminalnaha kodeksa nie adpaviadajuć Kanstytucyi, i prapanavaŭ abo admianić pakarańnie śmierciu, abo ŭvieści maratoryj na jaho vykanańnie», — nahadaŭ A. Ryhoni.

«Narodnym pavinna być u asnovie svajoj luboje rašeńnie, ale isnujuć peŭnyja pytańni, pa jakich kiraŭnictvu krainy treba ŭziać na siabie adkaznaść pieršaprachodcaŭ, jakija viaduć za saboj ludziej i pakazvajuć im šlach, — padkreślivajecca ŭ liście. — Pakarańnie śmierciu źjaŭlajecca apošniaj formaj admaŭleńnia pravoŭ čałavieka, jakaja parušaje normy i kaštoŭnaści Rady Jeŭropy. Ja prašu vas i Nacyjanalny schod Biełarusi ŭziać na siabie palityčnaje abaviazacielstva, jakoje harantuje, što nichto bolš nie budzie pakarany śmierciu ŭ Biełarusi».

BiełaPAN

• 0
• 0
• 0
• 0
• 0
• 0
• 0
• 0