Pasoł Fijona Hib: Vialikabrytanija chacieła b bačyć dalejšy prahres u Biełarusi

Vialikabrytanija hatova da bolš aktyŭnaha supracoŭnictva ź Biełaruśsiu, ale chacieła b bačyć «dalejšy prahres u śfiery pravoŭ čałavieka i ekanamičnych reformaŭ». Pra heta ŭ intervju BiełaPAN zajaviła novy pasoł Vialikabrytanii ŭ Biełarusi Fijona Hib.

Pavodle jaje słoŭ, brytanski bok z aściarožnaściu ŭstupaje ŭ palityčnyja adnosiny ź Biełaruśsiu. «Adna z pryčyn — situacyja z pravami čałavieka ŭ krainie. Jana niadobraja. Krychu lepš, čym była raniej. Zrobleny maleńkija kroki, ale ŭ budučyni my b chacieli ŭbačyć bolšy prahres u hetaj śfiery», — skazała dypłamat.

Fijona Hib spadziajecca na toje, što paśla admieny sankcyj ES reputacyja Biełarusi palepšycca. Pavodle jaje słoŭ, sankcyi nie pieraškadžali biełaruska-brytanskamu supracoŭnictvu ŭ šerahu śfier. «Kali vy chočacie skazać, što z-za sankcyj nie było bolš inviestycyj ź Vialikabrytanii ŭ Biełaruś, to ja nie dumaju, što sankcyi byli pryčynu hetaha. My mahli inviestavać. Supracoŭnictva ŭ kulturnaj i ekanamičnaj śfierach zaŭsiody było mahčymym», — zaznačyła pasoł.

U toj ža čas uviadzieńnie sankcyj adbivajecca na reputacyi krainy, dadała jana.

Fijona Hib nie stała ŭdakładniać, jakuju pazicyju zajmała Vialikabrytanija pry abmierkavańni pytańnia ab losie abmiežavalnych mier u dačynieńni da Biełarusi na pasiadžeńni Savieta ministraŭ zamiežnych spraŭ krain ES 15 lutaha ŭ Brusieli. «Ciapier indyvidualnyja pazicyi krain užo nie važnyja, — zajaviła jana. — Vialikabrytanija zhodnaja z vynikam. Važna, što ES pahadziŭsia źniać sankcyi, a jak my damaŭlalisia — heta ŭžo nie istotna».

Na pytańnie, jaki prahres u Biełarusi ŭbačyli krainy ES pry rašeńni admianić sankcyi ŭ dačynieńni da aficyjnaha Minska, Hib adkazała: «Była spravazdača BDIPČ ABSIE pa vynikach nazirańnia za prezidenckimi vybarami, jakuju niadaŭna apublikavali. Tam adznačaŭsia nievialiki prahres. Byli maleńkija kroki — naprykład, vyzvaleńnie palitviaźniaŭ u žniŭni minułaha hoda. Prezidenckija vybary prajšli biez hvałtu».

Pavodle słoŭ brytanskaha dypłamata, pradstaŭniki apazicyi i hramadzianskaj supolnaści Biełarusi na sustrečach ź joj taksama adznačali nievialikaje palapšeńnie situacyi ŭ krainie. Pry hetym Fijona Hib udakładniła, što sustrakałasia z byłym kandydatam u prezidenty Taćcianaj Karatkievič, sustaršynioj arhkamiteta pa stvareńni partyi «Biełaruskaja chryścijanskaja demakratyja» Paŭłam Sieviaryncam, staršynioj Abjadnanaj hramadzianskaj partyi Anatolem Labiedźkam, pradstaŭnikami zakrytaha ŭładami pravaabarončaha centra «Viasna», a taksama hramadskich abjadnańniaŭ «Biełaruskaja asacyjacyja žurnalistaŭ» i «Pres-kłub Biełarusi».

• 0
• 0
• 0
• 0
• 0
• 0
• 0
• 0