Vaščykoŭski: Pytańnie akredytacyi «Biełsata» nie abmiarkoŭvałasia. Heta napieradzie. Makiej: Biełaruś budzie imknucca dyviersifikavać svaje adnosiny

Upieršyniu za apošnija vosiem hadoŭ Biełaruś z dvuchbakovym vizitam naviedaŭ ministr zamiežnych spravaŭ Polščy Vitald Vaščykoŭski. Jašče ŭ 2010 napiaredadni vybaraŭ u Minsk sumiesna ź niamieckim ministram Hida Viesterviele pryjazdžaŭ Radasłaŭ Sikorski. Adnak paśla razhonu Płoščy pieramovy zamarozilisia.

Pavialičyć

Vitald Vaščykoŭski — pradstaŭnik kansiervatyŭnaha ŭrada, jaki pryjšoŭ da ŭłady ŭvosień letaś. «Novy ŭrad paličyŭ, što nienarmalna, kali susiedzi doŭhi čas nie sustrakajucca», — adznačyŭ Vaščykoŭski.

Jon pačaŭ svoj vizit u Biełaruś z naviedvańnia Kurapataŭ. I heta simvaličny krok. «Našy narody byli achviarami adnoj impieryi», — adznačyŭ pan ministr.

Kiraŭnik biełaruskaha MZS Uładzimir Makiej adznačyŭ, što z polskim kaleham jany praviali «adkrytuju, ščyruju i pładatvornuju razmovu». «Heta znakavaja i svoječasovaja padzieja», — dadaŭ jon. Sapraŭdy, Vaščykoŭski — heta pieršy jeŭrapiejski vizicior takoha ranhu paśla źniaćcia sankcyj suprać biełaruskich čynoŭnikaŭ.

Makiej adznačyŭ, što Biełaruś vielmi nastrojenaja na narmalizacyju adnosin ź Jeŭrasajuzam. «Adnak heta nie značyć, što my budziem z kimści razryvać adnosiny. Biełaruś budzie imknucca dyviersifikavać svaje adnosiny», — adznačyŭ biełaruski ministr.

U chutkim časie Makiej pavinien ździejśnić vizit u adkaz u Varšavu. Pra vizit na bolš vysokim uzroŭni havorki pakul nie viadziecca.

Abodva ministry padkreślivali, što havorka viałasia na samyja roznyja temy: ad ekanamičnaha supracoŭnictva da kulturnaha. «Na žal, za apošni čas tavarazvarot pamiž Biełaruśsiu i Polščaj źmienšyŭsia, ciapier my budzie pracavać nad tym, kab uznavić jaho i naraścić», — heta znoŭ słovy Uładzimira Makieja.

Na pytańnie karespandenta ahienctva BiełaPAN, jakoje Uładzimir Makiej pradstaviŭ jak «apazicyjny ŚMI», ci abmiarkoŭvali baki pytańnie akredytacyi telekanała «Biełsat», Vaščykoŭski adkazaŭ: «Pakul nie. Heta napieradzie».

Polski ministr adznačyŭ, što dla jaho partyi pytańnie pravoŭ čałavieka vielmi važnaje. «Ale śviet nie stvaraŭsia za adzin dzień», — vobrazna adznačyŭ polski hość. Maŭlaŭ, Polšča čakaje palapšeńnia situacyi ŭ Biełarusi ŭ hetym płanie, ale nie imhniennaha.

Vizit adbyvaŭsia ź inicyjatyvy polskaha boku, adnak Minsk arhanizavaŭ usio vielmi chutka. «Ja jechaŭ u Biełaruś biez usialakich papiarednich damovaŭ», — skazaŭ pan Vaščykoŭski.

Abmiarkoŭvałasia taksama pytańnie źmianšeńnia cany na vizy dla hramadzian Biełarusi, transhraničnaje supracoŭnictva, navat adnosiny z Kitajem.

Paśla Minska Vitald Vaščykoŭski naviedaje Vaŭkavysk, adkul pachodzić jaho maci.

«My z vami ziemlaki», — zaŭśmichaŭsia ŭradženiec Hrodzienščyny Uładzimir Makiej.

Sustreča Vaščykoŭskaha z Alaksandram Łukašenkam moža adbycca zaŭtra.

• 0
• 0
• 0
• 0
• 0
• 0
• 0
• 0