U Rečycy milicyja zatrymała žurnalista-fryłansiera Kastusia Žukoŭskaha
U Rečycy 24 sakavika milicyja zatrymała žurnalista-fryłansiera z Homiela Kastusia Žukoŭskaha.
Jak paviedamiŭ Žukoŭski, jon pravodziŭ vuličnaje apytańnie la Doma pobytu ŭ centry Rečycy. «Kala Doma pobytu raźmieščana, pryčym užo daŭno, vykazvańnie Kastusia Kalinoŭskaha «Nie narod dla ŭrada, a ŭrad dla naroda». Ja prasiŭ miascovych žycharoŭ vykazać ich mierkavańnie: ci zhodnyja jany z hetymi słovami. Ale pryjšła milicyja i biez tłumačeńnia pryčyn prapanavała mnie prajści ŭ RAUS», — adznačyŭ Žukoŭski.
Fryłansier źviarnuŭ uvahu, što milicyjanty nie nazvalisia, nie patłumačyli sutnaść pretenzij da jaho, i pavodzili siabie, pavodle jaho słoŭ, «nachabna, jak kryminalnyja elemienty».
Žukoŭski nieadnarazova zatrymlivaŭsia milicyjaj i pryciahvaŭsia sudami da administracyjnaj adkaznaści za prafiesijnuju dziejnaść. Jamu staviacca ŭ vinu pravaparušeńni, praduhledžanyja artykułam 22.9 KoAP, — niezakonny vyrab pradukcyi ŚMI. Fryłansiera abvinavačvajuć u tym, što jon biez akredytacyi pracuje karespandentam zamiežnaha ŚMI — spadarožnikavaha telekanała «Biełsat». Žukoŭski admaŭlaje, što znachodzicca ŭ pracoŭnych adnosinach z telekanałam, i pryznaje, što sapraŭdy zdymaje videa ab vostrych sacyjalnych prablemach, ale raźmiaščaje jaho ŭ svaim błohu, na Youtube i na inšych internet-staronkach. Pry hetym jon adznačaje, što hetaje videa moža vykarystoŭvać luby achvotny.
U 2015-2016 hadach Kastuś Žukoŭski pa rašeńniach roznych sudoŭ Homielskaj vobłaści aštrafavany bolš jak na 70 miljonaŭ rubloŭ. Užo z pačatku 2016 hoda jaho nieadnarazova pryciahvali da adkaznaści za «niezakonny vyrab pradukcyi ŚMI» rajonnyja sudy ŭ Karmie, Mazyry, Kalinkavičach, Buda-Kašalovie, Žłobinie i Homieli.
17 sakavika sud Mazyrskaha rajona znoŭ pryznaŭ fryłansiera vinavatym pa artykule 22.9 KaAP i pakaraŭ štrafam u 7,35 młn rub.
Kamientary