Łukašenka vyznačyŭ vorahaŭ narodu
Kali vieryć NISEPD, ich u nas 42 % nasielnictva. Piša ŭ svaim błohu Alaksandar Kłaskoŭski.
Praciŭniki pabudovy AES — "heta navat nie palitykany, a heta prosta vorahi našaha narodu". Tak zajaviŭ siońnia Alaksandar Łukašenka na Homielščynie. Paralelna na "Čarnobylskim šlachu" Milinkievič abvieściŭ pra pačatak zboru podpisaŭ suprać budaŭnictva AES.
Darečy, zhodna z sakavickim apytańniem NISEPD, da idei pabudovy AES admoŭna staviacca 42,1% biełarusaŭ (uchvalajuć — 37,4%). Ci nie zašmat vorahaŭ?
Zrešty, zrazumieła, što aficyjny kiraŭnik najpierš maje na ŭvazie dziejačaŭ apazycyi dy kaho-kolviek z navukoŭcaŭ-emihrantaŭ, što aktyŭna aryjentujuć Zachad u čarnobylskim pytańni, i zusim nia tak, jak chaciełasia b aficyjnamu Miensku ("heta nie navukoŭcy, a bandyty ad palityki"). Sa słoŭ prezydenta, "im treba pierad parlamenckimi, prezydenckimi vybarami razadźmuć hetaje kadziła". Ale "im nie pašencić ŭźniacca za košt ekspluatacyi hetaje temy, ja im hetaha nikoli nie dazvolu". Zrazumieła: z vorahami razmova karotkaja!
Takim čynam, ułada sama palityzuje prablemu. I zusim daremna. Bo šmat u kaho sumnievy nakont nieabchodnaści ajčynnaha "mirnaha atamu" vyklikanyja zusim nia ducham tatalnaha piarečańnia režymu. I nie banalnaj radyjafobijaj. Miž tym ułada ćvierdzić pra namier zamović dobry reaktar dy padkreślivaje, što pa perymietry siniavokaj respubliki ŭsio adno da chalery tych AES (znajšli suciašeńnie! :).
Ale ž arhumenty skieptykaŭ — ź inšaje opery. Havorka jdzie pra chutki rost koštu ŭranu; pra niebiaśpieku trapić u jašče bolšuju zaležnaść ad Rasiei, kali zamovu atrymaje jejnaja firma; pra resursy alternatyŭnaj enerhietyki. Narešcie, pra nieabchodnaść chutka madernizavać ekanomiku, nadavać joj inavacyjnaje abličča (bo kali i dalej vyłupiŭšy vočy hnać saŭkovy VUP, to praź niejki čas pradukcyju industryjalnych monstraŭ — pahłynalnikaŭ enerhii ciažka budzie ŭpierci navat plemieni mumbu-jumbu :)
Jarłyk ža "vorahaŭ narodu" stavić kryž na mahčymaści kanstruktyŭnaje hramadzkaje dyskusii pa hetym kole najaktualniejšych pytańniaŭ. Znoŭ — čorna-biełaja schiema. Pytańnie "Ty za AES ci suprać?" stanovicca analaham pytańnia "Ty za Łukašenku ci suprać?". I kampanija apazycyi choćki-niachoćki budzie vyhladać nie jak akumulacyja niejkaha stanoŭčaha patencyjału, a jak svojeasablivaja rehistracyja praciŭnikaŭ ŭłady. Užo tamu masavaść, skažam tak, nie harantavanaja. Tym bolej što siońniašni mesydž kiraŭnika dziaržavy bolej čym vyrazny. Balšynia abyvatalaŭ nie ryzyknie "śviacicca" ŭ padpisnych listach.
Ideja AES choć i nia nadta papularnaja, ale i nie vybuchovaja ŭ sensie pratestavych nastrojaŭ. Paśla Čarnobylu biełarusy ŭžo da ŭsiaho pryciarpielisia, a palityzacyja temy "mirnaha atamu" jak uładaj, tak i apazycyjaj daŭno prytupiła vastryniu ŭsprymańnia i vyklikaje, badaj, tolki apatyju.
Kamientary