Dekret ab darmajedach moža być źmienieny

Mahiloŭ, 5 krasavika. U Saviet ministraŭ Biełarusi ŭniesieny prajekt źmienaŭ dekreta № 3 «Ab papiaredžańni sacyjalnaha ŭtrymanstva», havorycca ŭ adkazie namieśnika ministra pracy i sacyjalnaj abarony Valeryja Kavalkova na zvarot hramadzian.

Jakija mienavita źmieny płanujucca, Minpracy nie paviedamlaje.

U kancy 2015 hoda Biełaruskaja sacyjał-demakratyčnaja partyja (Hramada) nakiravała ŭ Administracyju prezidenta 10 tysiač podpisaŭ, sabranych pad patrabavańniem admieny dekreta № 3, bo jon supiarečyć Kanstytucyi i mižnarodnym pravavym aktam, ratyfikavanym Respublikaj Biełaruś. Faktyčna kraina ŭviała abaviazkovuju pracoŭnuju pavinnaść na niepracoŭnych hramadzian, śćviardžali aŭtary zvarotu.

Jak havorycca ŭ adkazie namieśnika ministra, dekret nie praduhledžvaje prymusovuju pracu hramadzian, a ŭvodzić abaviazak pa vypłacie zboru na finansavańnie dziaržaŭnych vydatkaŭ.

«Dekretam ustanoŭlena, što tolki na padstavie rašeńnia suda ŭ vypadku niavypłaty abo niapoŭnaj vypłaty hramadzianinam ŭ adpaviednym padatkovym pieryjadzie zboru na finansavańnie dziaržaŭnych vydatkaŭ moža być prymienieny administracyjny aryšt», — adznačaje namieśnik ministra, adznačajučy pry hetym, što administracyjna aryštavanyja abaviazkova pryciahvajucca da vykanańnia hramadska karysnych rabot.

Takim čynam, na dumku Kavalkova, pałažeńni dekreta nie ŭvachodziać u supiarečnaść z Kanstytucyjaj Biełarusi.

Jak vynikaje z adkazu namieśnika ministra, na 1 studzienia 2016 hoda ŭ krainie na ŭliku pa biespracoŭi znachodzilisia 49,2 tys. čałaviek, a najmalnikami byli zajaŭlenyja źviestki ab najaŭnaści 28,7 tys. pracoŭnych miescaŭ.

Pry hetym, jak piša namieśnik ministra, luby zakon nie zaŭsiody ŭličvaje asablivaści kankretnych situacyj i składanych momantaŭ u žyćci asobnych hramadzian.

«Kab nie dapuskać taki ŭsiarednieny i farmalny padychod da hramadzian, artykułam 43 Padatkovaha kodeksa Respubliki Biełaruś miascovym savietam deputataŭ abo pavodle ich daručeńnia miascovym vykanaŭčym i rasparadčym orhanam dadzienaje prava davać asobnym płacielščykam — fizičnym asobam, jakija nie źjaŭlajucca indyvidualnymi pradprymalnikami, zychodziačy ź ich majomasnaha stanovišča, lhoty pa respublikanskich padatkach, zborach (pošlinach), što poŭnaściu vypłačvajucca ŭ miascovyja biudžety», — adznačaje Kavalkoŭ.

Choć namieśnik ministra śćviardžaje, što dekret nie ŭvodzić prymusovuju pracu, mienavita prymusovaj pracaj i źjaŭlajecca abaviazak pavodle suda vykanańnie jakich by tam ni było rabot, zajaviŭ BiełaPAN pieršy namieśnik staršyni BSDP (Hramada) Ihar Barysaŭ, nahadaŭšy, što 4 krasavika nabyli moc źmieny, zhodna ź jakimi možna aryštoŭvać «darmajedaŭ». Jon taksama adznačyŭ, što Padatkovy kodeks rehuluje mahčymaść davańnia lhot pa hetym zbory, a heta aznačaje, što heta ŭsio-taki «nie zbor, a mienavita padatak na darmajedaŭ».

«Pakul pravaprymianialnaj praktyki ŭ hetym pytańni niama. Pakul nichto nie paciarpieŭ za svajo «darmajedstva». Nu a kali pieršych ludziej buduć kidać za kraty, budzie cikava pahladzieć, jak jany prymusiać čałavieka, jakoha aryštujuć na 10-15 sutak, pracavać. Bo hetyja ludzi taksama mohuć admovicca», — skazaŭ Barysaŭ.

Razam z tym jon adznačyŭ, što sabranyja podpisy, mabyć, u niejkaj stupieni paŭpłyvali na mahčymyja źmieny dekreta № 3. «Praŭda, ich sutnaść nieviadomaja, ale toje, što možna vyzvalać hramadzian ad zboru za «darmajedstva» pavodle rašeńnia miascovych uład, heta ŭžo stanoŭčy momant», — zajaviŭ sacyjał-demakrat.

• 0
• 0
• 0
• 0
• 0
• 0
• 0
• 0