Minabarony Biełarusi papiaredžvaje pra niebiaśpieku Pokemon Go sa spasyłkaj na rasijskaha błohiera
«Videakamieraj CRU u kožnym domie» nazvała «Biełaruskaja vajennaja hazieta» mabilnuju hulniu Pokemon Go, jakaja chutka zavajavała papularnaść va ŭsim śviecie.
Aŭtar materyjału, na žal, spasyłajecca nie na rekamiendacyi biełaruskich vajennych śpiecyjalistaŭ pa kibier-biaśpiecy, ale rasijskaha błohiera, jaki naŭprost źviazaŭ raspracoŭščykaŭ hulni z Centralnym raźviedvalnym upraŭleńniem ZŠA.
Amal uvieś artykuł ujaŭlaje ź siabie cytatu z pasta rasijskaha błohiera — nie nadta aŭtarytetnaja krynica dla aficyjnaha vajennaha vydańnia.
Pavodle mierkavańnia błohiera, Pokemon Go była stvoranaja pa zamovie CRU z raźviedvalnymi metami, tamu što raspracoŭščyk hulni kampanija Niantic Labs była stvorana Džonam Chenkam, a Chenk raniej zasnavaŭ kampaniju Keyhole, Inc., jakaja častku finansavańnia na prajekt pa kartahrafavańni ziamli atrymała ad vienčurnaha fonda CRU.
«Zastavałasia adna prablema: jak zazirnuć u našy chaty, sklapieńni, cianistyja alei, kazarmy, dziaržustanovy i hetak dalej pa śpisie? … Kantorka Niantic Labs vypuskaje hienijalnuju virusnuju hulniu z navamodnaj technałohijaj dapoŭnienaj realnaści», - cytuje hazieta zamiežnaha błohiera.
Raniej adździeł infarmacyjnaj biaśpieki izrailskaj armii paviedamiŭ žaŭnieram, što hulnia patrabuje infarmacyju pra miescaznachodžańnie čałavieka i abjekty, jakija znachodziacca pobač ź im. Da taho ž, hetaja infarmacyja moža patrapić u adkryty dostup u internecie. Heta stvaraje niebiaśpieku dla vajskoŭcaŭ.
Adnak izrailskija vajennyja kampjutarščyki abyšlisia biez cytat z rasijskich cyvilnych błohaŭ.
Ciapier čytajuć
«Biada, na vialiki žal, užo stupaje na paroh Siniavokaj». Ultymatum Zialenskaha Łukašenku: što budzie dalej?71
Kamientary