Kodeks ab kultury: Nie chvalujciesia, nichto złoŭžyvać farmuloŭkaj nie źbirajecca

Alaksandr Łukašenka padpisaŭ «Kodeks ab kultury», i ciapier u krainie adziny miechanizm rehulavańnia stasunkaŭ u śfiery kultury. Jeŭraradyjo pračytała 227 staronak dakumienta i znajšło niekalki vielmi cikavych momantaŭ.

Artykuł №130 »Zabarona, abmiežavańnie i prypynieńnie kulturnaj dziejnaści». Pavodle adnaho z punktaŭ artykuła, «kulturnaja dziejnaść moža być zabaronienaja, abmiežavanaja abo prypynienaja, kali pry jaje ažyćciaŭleńni raspaŭsiudžvajucca paviedamlenni, što źniesłaŭlajuć honar i hodnaść prezidenta, kiraŭnikoŭ dziaržaŭnych orhanaŭ, status jakich ustanoŭleny Kanstytucyjaj».

Luboje admoŭnaje słova tvorcy ŭ bok ułady aficyjna možna być padstavaj zabaraniać kancerty, nie davać pradavać dyski, repietavać? Biez dakładnaha vyznačeńnia, navat žart u KVZ možna ŭspryniać, jak źniesłaŭleńnie honaru i hodnaści.

«Nie chvalujciesia, nichto złoŭžyvać hetaj farmuloŭkaj nie źbirajecca, — kamientuje  kansultant jurydyčnaha adździeła Ministerstva kultury Ludmiła Barščeŭskaja. — Admysłovych kamisij dla hetaha stvarać nie płanujecca. Vy ž razumiejecie, što takim čynam, kali pastavić metu, možna ŭsio pieradziornuć. Ja dumaju, što ŭ dadzienym vypadku nichto nieabhruntavanych pretenzij pradjaŭlać nie budzie. Tym bolš, da žartaŭ, bo pačućcio humaru jość u va ŭsich».

Mohuć pradjaŭlać pretenzii, a mohuć i nie. Ale ciapier navat nie treba budzie prydumlać farmuloŭki pad admovaj u «hastrolcy», vyklikać MNS za hadzinu da vystupu Lavona Volskaha, Siarhieja Michałka ci Źmitra Vajciuškieviča. Dastatkova spasłacca na 130 artykuł kodeksa ab kultury.

U dapamohu čynoŭnikam budzie i 216-y artykuł kodeksa — «Paradak arhanizacyi i praviadzieńnia kulturna-vidoviščnaha mierapryjemstva». Tam prapisana, što «u čas naviedvańnia kulturna-vidoviščnaha mierapryjemstva hramadzianam zabaraniajecca karystacca ściahami, vympiełami, nie zarehistravanymi va ŭstanoŭlenym paradku, a taksama emblemami, simvałami, płakatami i transparantami, źmiest jakich nakiravany na pryčynieńnie škody hramadskamu paradku, pravam i zakonnym intaresam hramadzian».

«Jašče nie było vypadku, kab čałavieku pradjaŭlalisia pretenzii za razmachvańnie na kancercie ściaham ź simvolikaj hurta Metallica, — znoŭ prosić nie pieradziorhvać Ludmiła Barščeŭskaja. — Paviercie, tak jano budzie i dalej».

Za Metallica — nie było, a za bieł-čyrvona-bieły ściah? Jon maje toj ža status, što i ściah z nadpisam Metallica ci nazvaj jakoha inšaha hurta. Za pieršy pretenzii pradjaŭlajuć, a za druhi — nie. Pramoje pytańnie na hety kont kansultant jurydyčnaha adździeła Ministerstva kultury pakinuła biez kamientaryjaŭ.

Paśla ŭviadzieńnia «padatku na darmajedstva», u Biełarusi aktualnaje atrymańnie statusu «Tvorčaha rabotnika», ź jakim tvorčyja asoby pierastajuć ličycca darmajedami. Kab atrymać zapavietny siertyfikat, treba dakazać admysłovaj kamisii pry Minkulcie, što ty tvorca. Ale pry vyvučeńni aznačeńniaŭ u Kodeksie ab kultury hety momant padajecca niełahičnym.

Pavodle kodeksa, «tvorčy rabotnik — hramadzianin, jaki zajmajecca tvorčaj dziejnaściu, niezaležna ad taho, źjaŭlajecca jon členam tvorčaha sajuza ci nie». To bok dastatkova zajmacca tvorčaj dziejnaściu, a heta — «vid kulturnaj dziejnasci, jaki ŭklučaje mastackuju tvorčaść i inšuju intelektualnuju dziejnaść, što zaviaršajecca źjaŭleńniem novaha vyniku intelektualnaj dziejnasci ŭ śfiery kultury, jaki nie isnavaŭ raniej».

To bok sam fakt stvareńnia novaha mastackaha ci intelektualnaha praduktu (nie skradzienaha, a mienavita novaha) — tvorčaja dziejnaść. Ni pra jakija adukacyi tvorcaŭ, umieńni pisać noty, ładzić kancerty dy vystavy, havorki nie viadziecca. Adpaviedna, kamisija patrebnaja tolki kab pramanitoryć, ci nie skraŭ toj ci inšy čałaviek pryniesieny vynik intelektualna dziejnaści. Tamu paśla nabyćcia mocy Kodeksam ab kultury, basist hurta Akute Roma Žyharaŭ moža asprečyć admovu kamisii ŭ prysvajeńni jamu statusu tvorčaha rabotnika. Tym bolš, što matyvavali jany heta rašeńnie pamyłkami ŭ napisańni notaŭ.

Kodeks ab kultury nabudzie moc praz paŭhoda paśla aficyjnaj publikacyi, ale, kali jon budzie nadrukavany, nie paviedamlajecca.

• 0
• 0
• 0
• 0
• 0
• 0
• 0
• 0