Sumnyja ličby: paraŭnali biudžety i kolkaść turystaŭ na Jeŭrapiejskich hulniach u Minsku i Baku

Biudžet: tanna nie atrymałasia

Aficyjny biudžet Jeŭrapiejskich hulniaŭ u Baku skłaŭ $1,12 miljarda. Na arhanizacyi nie ekanomili — adno tolki vystupleńnie Łedzi Hahi na cerymonii adkryćcia kaštavała $2 miljony. A samo šou — $95 miljonaŭ.

U Minsku ž na cyrymonii adkryćcia i zakryćcia źbirajucca addać $12 miljonaŭ. Ale i chedłajniery — Hanna Niatrebka i Mikałaj Baskaŭ — nie taho ŭzroŭniu.

Pa padlikach VVS, Azierbajdžan patraciŭ na hulni kudy bolš za aficyjnuju ličbu — kala $5 miljardaŭ. Bo srodki na padrychtoŭku vydatkoŭvalisia ź biudžetu nie tolki ŭ hod praviadzieńnia spabornictvaŭ, ale ŭ 2013-m i 2014-m. Za ich košt, u pryvatnaści, pabudavali Pałac vodnych vidaŭ sportu, himnastyčny kompleks, futbolny stadyjon na 65 tysiač hledačoŭ, park Jeŭrapiejskich hulniaŭ u Baku, alimpijskija spartyŭnyja kompleksy ŭ 11 rehijonach krainy i «damy moładzi» ŭ 9 rehijonach.

Pavialičyć

U Biełarusi nieabchodnaja spartyŭnaja infrastruktura zbolšaha była. Z taho, što dadatkova zrabili, — praviali rekanstrukcyju niekatorych arenaŭ, pabudavali stałovuju dla spartoŭcaŭ u Studenckaj vioscy, a ŭ samoj vioscy adramantavali pakoi, kab zamiest navučencaŭ zasialić tudy atletaŭ. Praŭda, šmat hrošaj paciahnuła «infarmacyjna-technałahičnaja płatforma». Na zapusk aficyjnaha sajta hulniaŭ, prakładku optavałakna i inšyja IT-składniki pajšło $37 miljonaŭ.

Adznačym, što ŭ 2016 hodzie Łukašenka zajaŭlaŭ, što ahułam na padrychtoŭku da hulniaŭ nie patraciać bolš za $50 miljonaŭ. «Heta ślozy dla krainy», — prakamientavaŭ jon tady hetu sumu.

Turystaŭ — u 4 razy mienš, čym čakałasia

Za čas Jeŭrapiejskich hulniaŭ Baku naviedała 28 tysiač turystaŭ. U Biełarusi, uziaŭšy za aryjencir hetu ličbu, čakali nie mienš za 30 tysiač zamiežnych haściej.

«Heta ličba ź vielmi vialikaj ahavorkaj, pakolki Baku byŭ daloka, paloty tudy byli dastatkova darahimi. U našym vypadku čakajecca našmat bolš turystaŭ», — zapeŭnivaŭ namieśnik dyrektara Dyrekcyi Jeŭrapiejskich hulniaŭ Anatol Kotaŭ.

Pavialičyć

Pakul pryjechała tolki 8 tysiač. Cyrymonija zakryćcia hulniaŭ užo ŭ hetu niadzielu, tamu małavierahodna, što kolkaść turystaŭ nablizicca da žadanaj.

Dla paraŭnańnia, kali ŭ Minsku ŭ 2014 hodzie prachodziŭ čempijanat śvietu pa chakiei, krainu naviedała kala 80 tysiač turystaŭ.

Spartoŭcaŭ taksama stała mienš

Novy farmat, vidać, pakul nie nadta cikavy i samim spartoŭcam. Kali hulni ŭ Baku sabrali 5,7 tysiačy atletaŭ, to ŭ Minsk vyrašyła pryjechać značna mienš — 4 tysiačy. Na pieršych hulniach spartoŭcy spaborničali ŭ 30 vidach sportu, na sioletnich — u 15.

Cikava, što ŭ 2015 hodzie zbornaja Azierbajdžana była druhoj u miedalnym zaliku. Biełaruś pakul taksama trymajecca na druhim radku rejtynhu. Pieršynstvo i tady, i ciapier — za Rasijaj.

• 0
• 0
• 0
• 0
• 0
• 0
• 0
• 0