Połackaja nastaŭnica źniała na videa, jak treciakłaśniki śpiavajuć pieśniu «Ałkahalička». Što heta było? VIDEA
Videa, na jakim vučni treciaha kłasa adnoj z połackich škoł śpiavajuć u kłasie pieśniu «Ałkahalička», apublikavała ŭ svaim instahramie nastaŭnica-praktykantka Jana Nasatovič.
18-hadovaja Jana Nasatovič — navučenka Połackaha kaledža VDU imia Mašerava. A ŭ škole znachodzicca na praktycy, raskazała zahadčyca adździaleńnia pačatkovaj adukacyi Volha Rybakova.
«Heta videa chutka raźlaciełasia pa roznych haradskich pablikach. U siecivie jano padadziena pad zahałoŭkam: «Čamu tolki vučać dziaciej u škołach?» A było nie tak.
Jana patłumačyła, što chacieła źniać sacyjalny rolik. A dzieci sami padkazali joj temu, kali padčas pierapynku stali śpiavać hetu pieśniu»,
— raskazvaje Volha Rybakova.
Vykładčyca raskazvaje, što paśla taho jak videa źjaviłasia ŭ internecie, Janu vyklikali ŭ kaledž.
«Z navučenkaj była praviedzienaja razmova, kiraŭnictva kaledža vybačyłasia pierad kiraŭnictvam škoły, kudy Janu nakiravali na praktyku. Praktyka jašče tolki pačałasia, budziem bačyć, jak budzie dalej. Siońnia ŭ kaledžy adbudziecca ahulny schod, na jakim my jašče raz praviadziem z navučencami prafiłaktyčnyja razmovy nakont pavodzinaŭ u internecie», — kaža Volha Rybakova.
U škole, dzie Jana prachodzić praktyku, u jaje adbyłasia razmova z baćkami.
«Dziaŭčyna patłumačyła baćkam, što nie pieršy raz zaŭvažała, jak dzieci śpiavajuć padobnyja pieśni. Usie baćki stali na jaje bok», — raskazvaje vykładčyca Jany Nasatovič.
«Jana chacieła pazdymać takija frahmienty, kab paśla zrabić sacyjalny rolik pra kulturu prasłuchoŭvańnia piesień, čytańnia knih».
«Jana Nasatovič vučycca dobra, u jaje vysoki bał. I nijakich prablem z hetaj navučenkaj u nas nie było. Dziaŭčyna sama šakavana tym, jak heta padadziena ŭ internecie. Jana napisała zajavu ŭ milicyju na błohiera, jaki raspaŭsiudziŭ heta videa», — raspaviała Volha Rybakova.
Sama Jana Nasatovič hetuju historyju kamientavać nie zachacieła.
Ciapier čytajuć
Milicyja zatrymała taho samaha rasijskaha turysta, jaki kinuŭ niedakurak na vulicy. Zaŭtra sud25
Kamientary