12 červienia ŭ Navapołacku ŭ Dźvinie znajšli cieła zabitaj 16-hadovaj dziaŭčyny. «Naša Niva» daviedałasia padrabiaznaści trahiedyi.
Anhielina P. — pieršakurśnica navapołackaha muzyčnaha kaledža. Dziaŭčyna vučyłasia na dyryžora akademičnaha chora. Sama rodam z-pad Lepiela, žyła ŭ internacie ad navapołackaha kaledža.
«Dziaŭčynka vučyłasia narmalna, dyscyplinarnych prablem nie mieła. Ni na jakim uliku nie stajała, — raspaviała «Našaj Nivie» dyrektarka kaledža Natalla Molisava. — Vučanica źnikła ŭviečary ŭ čaćvier, 11 červienia. Jana nie viarnułasia ŭ internat: pa praviłach vučni musiać być u internacie nie paźniej za 22:00.
Toje, što dziaŭčyny niama, zaŭvažyła vychavacielka. Paviedamili pra heta namieśnicy dyrektara, taja ŭžo vyklikała milicyju».
Cieła dziaŭčyny znajšli na nastupny dzień u Dźvinie.
Znajomyja dziaŭčyny kažuć, što jana paznajomiłasia ź niejkim chłopcam u sacyjalnych sietkach. Pierapisvalisia praz «UKantakcie». Tam i damovilisia pra sustreču.
Na spatkańni vyrašyli vypić na bierazie Dźviny. Tam i zdaryłasia biada. Kažuć, što chłopiec zhvałciŭ dziaŭčynu. Ci to pierad hetym, ci to paśla jon mocna źbiŭ studentku.
«Tam šmat traŭmaŭ było: i vybityja zuby, i siniaki, i inšaje», — kažuć tyja, chto bačyŭ cieła.
Ciapier chłopiec zatrymany. Viadoma, što jamu 20 hadoŭ. Pa čutkach, jon nie miascovy, nie z Navapołacka. Kažuć, što chłopiec ci to sam zdaŭsia milicyi ŭ Mahilovie, ci to ŭ Mahilovie byŭ zatrymany.
Śledstva pa spravie praciahvajecca.
Anhielinu pachavajuć 15 červienia.
Ciapier čytajuć
Staŭ viadomy prysud eks-pamočniku Łukašenki Iharu Bryło4
Kamientary