SK admoviŭsia vyzvalić žurnalistku Kaciarynu Andrejevu pad paruku
Śledčy kamitet admoviŭ u zadavalnieńni chadajnictvaŭ staršyni Biełaruskaj asacyjacyi žurnalistaŭ Andreja Bastunca, hałoŭnych redaktaraŭ haziety «Novy Čas» Aksany Kołb, haziety «Narodnaja Vola» Iosifa Siaredziča, žurnalista Valeryja Kalinoŭskaha ab vyzvaleńni žurnalistki «Biełsata» Kaciaryny Andrejevaj (Bachvałavaj) pad asabistuju paruku, piša sajt BAŽ.
Staršy śledčy Frunzienskaha (h. Minska) rajonnaha adździeła Śledčaha kamiteta I. Kuryłovič u svajoj pastanovie, jakaja była dasłanaja zajaŭnikam, nazyvaje chadajnictvy nieabhruntavanymi, tamu jany nie mohuć być zadavolenyja.
«Padčas papiaredniaha rasśledavańnia sabranyja vyčarpalnyja dokazy ŭ dastatkovym abjomie, jakija pakazvajuć na ździajśnieńnie Bachvałavaj K. A. złačynstva, praduhledžanaha č. 2 art. 342 KK Respubliki Biełaruś. Da abvinavačvanaj Bachvałavaj K. A. zakonna i abhruntavana prymieniena miera strymańnia ŭ vyhladzie zaklučeńnia pad vartu, padstaŭ dla admieny jaje niama».
Raniej padobnuju admovu SK dasłaŭ na chadajnictvy ab vyzvaleńni Darji Čulcovaj. Śledčy nazvaŭ tyja chadajnictvy nieabhruntavanymi i niematyvavanymi. Taksama było tłumačeńnie, što ŭ vypadku vyzvaleńnia, Čulcova moža schavacca ad śledčych orhanaŭ i suda, pieraškadžać papiaredniamu rasśledavańniu kryminalnaj spravy.
Žurnalistki Kaciaryna Andrejeva (Bachvałava) i Darja Čulcova znachodziacca za kratami z 15 listapada, kali byli zatrymanyja paśla pramoj tranślacyi dla «Biełsata» z razhonu siłavikami akcyi ŭ Minsku. Ich vinavaciać u arhanizacyi hrupavych dziejańniaŭ, jakija hruba parušajuć hramadski paradak (art. 342 KK RB).
Ciapier čytajuć
U 2021 hodzie vypusknica admoviłasia pacisnuć ruku Hihinu na ŭručeńni dypłoma. Ciapier BDU nie choča jaho paćviardžać25
Kamientary