Prakuror zapatrabavała dla Kaciaryny Andrejevaj i Darji Čulcovaj pa 2 hady pazbaŭleńnia voli

Advakaty padsudnych — Siarhiej Zikracki i Alaksandr Chajecki.

Paśla pierapynku sud abviaściŭ pastanovu: pakolki škoda «Minsktransu» kampiensavanaja całkam, i pretenzij u pradpryjemstva nie majecca, vytvorčaść pa hramadzianskim pazovie vyrašana spynić.

Dalej u sudzie praciahnuli daśledavać dokazy. U zału ŭnieśli vialikuju čornuju sumku i skrynku, dziaržabvinavaŭca Alina Kaśjančyk pakazała ich źmieściva.

Zhodna z tłumačalnaj zapiskaj, u sumcy znachodziacca rečavyja dokazy pa spravie: mabilnyja telefony, kampjutary, fłeš-nazapašvalniki, płejer, dyktafon, čatyry štodziońniki, papiery z zapisami, mikrafon, akumulatarny błok, pieradatčyk, štatyŭ, maniška siniaha koleru z nadpisam Press, videakamiera, kabieli roznych koleraŭ.

Taksama ŭ skryncy byŭ bieł-čyrvona-bieły ściah i roznyja nalepki, pieraličyła Alina Kaśjančyk.

Cudździa Natalla Buhuk začytała pa-biełarusku analiz strymu linhvistam. Aŭtar linhvistyčnaj ekśpiertyzy — pradstaŭnik Akademii navuk, akademik Alaksandr Łukašaniec.

Pavodle jaho, słovy Andrejevaj mieli «abjektyŭnuju madalnaść» i «niejtralny charaktar».

Ekśpiert adznačaje, što słovy Kaciaryny Andrejevaj nie ŭtrymlivajuć zaklikaŭ da niejkich aktyŭnych dziejańniaŭ. Jana prosta apisvała situacyju.

Zatym adzin z advakataŭ padaŭ chadajnictva ab pierapynku dla suviazi ź jašče adnym śpiecyjalistam-linhvistam. Prakuror była suprać, sudździa chadajnictva adchiliła.

Takim čynam sudovaje śledstva skončanaje.

Sud pierachodzić da sprečak bakoŭ.

Prakuror zapatrabavała dla Kaciaryny Andrejevaj i Darji Čulcovaj pa 2 hady pazbaŭleńnia voli ŭ kałonii ahulnaha režymu, paviedamlaje Biełsat.

Advakat Darji Čulcovaj Alaksandr Chajecki kaža, što pradastaŭlenyja prakuroram u abvinavačvańni arhumienty nie mohuć być dokazam pravaparušeńnia žurnalistak.

Dyski z dokazam nie byli apiačatanyja, tamu jość sumnievy, adkul u śledstva ŭvohule hetyja zapisy. Pieratrus prachodziŭ biez sankcyi prakurora.

Siarhiej Zikracki, advakat Kaciaryny Andrejevaj padrychtavaŭ dla svajho vystupa vialikuju prezientacyju.

Jon uzhadvaje padziei paślavybarnaha pieryjadu i zabojstva Ramana Bandarenki.

«Ułady viedali, što na Płošču Pieramienaŭ pryjduć ludzi i musili arhanizavać ich biaśpieku. Tysiačy čałaviek nie mahli źmiaścicca na chodnikach, tamu całkam łahična, što jany vyjšli na darohu. Ułady musiać vykonvać prava hramadzianaŭ na mirnyja schody. Navat kali schod nie arhanizavany, ništo nia musić zaminać žurnalistam jaho aśviatlać.

Ja upeŭnieny, što nijakich dziejańniaŭ, jakija by hruba parušali hramadski paradak nie było. Adnak śledčyja ŭsio ž zaviali kryminalnuju spravu i navat «rascledavali» jaje», — kaža Siarhiej.

Pa jaho słovach, sud prahladzieŭ tolki tyja zapisy, jakija zapatrabavała dziaržabvinavaŭca.

«My ž nie možam ubačać ahulnuju karcinu i ŭžo dakazana, što ŭ słovach Kaciaryny niama zaklikaŭ. Kali žurnalistka paličyła patrebnym spasłacca na niejki telehram-kanał, to heta całkam jaje prava».

Darja Čulcova ŭvohule tolki zdymała videa i nijak nie kamientavała padziei, — dadaŭ Zikracki

«Ja nie ździajśniała nijakich supraćpraŭnych dziejańniaŭ. Usie materyjały pakazvajuć na maju nievinavataść. Ja spadziajusia na sumlenny i spraviadlivy apraŭdalny prysud», - skazała ŭ apošnim słovie Darja Čulcova.

Kaciaryna Andrejeva skazała, što apošnija šeść hadoŭ jana pryśviaciła žurnalistycy. Ciapier joj — 27. Apošni hod jana časta pracavała ŭ niebiaśpiečnych umovach.

«Kožny raz, sychodziačy na pracu, ja ryzykavała svaim zdaroŭjem i žyćciom. Tym nie mienš, ja išła ŭ epicentr padziej. Mnie ŭdavałasia chavacca ad abstrełaŭ humovymi kulami, vybuchaŭ śviatłošumavych hranat, udaraŭ dubinak.

Maim kaleham pašancavała značna mienš. U ich prycelna stralali, łamali nasy, ale da hetaha času pa faktach hvałtu nad imi nie zaviedziena nivodnaj kryminalnaj spravy, jak i nad mirnymi pratestoŭcami. 11 listapada byŭ zabity Raman Bandarenka za toje, što nie dazvalaŭ zrezać stužački.

15 listapada na «Płošču pieramienaŭ» vyjšli ludzi. Ja pakazvała hetyja padziei ŭ pramym efiry. Za heta mianie kinuli ŭ turmu pavodle prydumanaha abvinavačvańnia. Pradstaŭlenyja dokazy dakazvajuć maju nievinavataść. Ja nie ździajśniała złačynstva sama i nie padbuchtorvała nikoha da hetaha. <…> U mianie jość ŭsio: maładość, lubimaja prafiesija, viadomaść i, hałoŭnaje, čystaja sumleńnie.

Svaje siły ja chaču pryśviacić na stvareńnie, na pabudovu Biełarusi, u jakoj nie budzie palityčnych represij. Ja patrabuju apraŭdalnaha prysudu dla siabie, dla svaich kaleh i dla sotniaŭ palitviaźniaŭ»»

Prysud budzie abvieščany ŭ čaćvier a 10-j hadzinie.

• 0
• 0
• 0
• 0
• 0
• 0
• 0
• 0