U Jeŭrasajuzie prapanavali ŭvieści pieršy ŭ śviecie zakon, jaki abmiažoŭvaje vykarystańnie štučnaha intelektu

Jeŭrapiejskija čynoŭniki prapanavali zakonaprajekt dla rehulavańnia sistem štučnaha intelektu. Klučavy elemient zakonaprajekta — padzieł sistem štučnaha intelektu pa stupieni ryzyki dla biaśpieki, žyćcia i pravoŭ hramadzian. Zhodna z hetym zakonam, u ES mohuć zabaranić prymianieńnie tych technałohij, jakija ŭjaŭlajuć saboj vysokuju ryzyku dla ludziej, paviedamlaje The Wall Street Journal.

Da takich technałohij Jeŭrakamisija adnosić aŭtamatyzavanaje aceńvańnie testaŭ u śfiery adukacyi, kredytny skorynh, prahramnaje zabieśpiačeńnie, jakoje aŭtamatyčna najmaje supracoŭnikaŭ, rabatyzavanuju chirurhiju, a taksama vykarystańnie kampjutarnych ałharytmaŭ u śfierach jurysprudencyi. Kab trapić na rynak, takim technałohijam pryjdziecca adpaviadać strohim kryteryjam biaśpieki, dakładnaści i jakaści.

«Naša rehulavańnie datyčycca čałaviečaj i sacyjalnaj ryzyki, źviazanaj z vykarystańniem štučnaha intelektu. My ličym, što heta terminovaje pytańnie, tamu prapanoŭvajem pieršuju ŭ śviecie pravavuju asnovu dla sučasnych technałohij», — zajaviła Marhret Viestahier, vice-prezient Jeŭrapiejskaj kamisii.

Tyja technałohii štučnaha intelektu, jakija ŭjaŭlajuć saboj minimalnuju ryzyku dla hramadstva, ekśpierty ES prapanujuć nie rehulavać. Na ich dumku, da hetaj katehoryi adnosicca bolšaść sučasnych technałohij.

Płanujecca abmiežavać vykarystańnie palicyjaj sistem raspaznavańnia tvaraŭ u svaich metach. Adnak mohuć być vyklučeńni, kali takija technałohija spatrebiacca dla pošuku skradzienych dziaciej, praduchileńnia terarystyčnych pahroz i vyjaŭleńnia machlaroŭ i zabojcaŭ.

U apošnija hady ES imkniecca stać hłabalnym lidaram u pytańniach strymlivańnia patencyjnaj niebiaśpieki novych technałohij u roznych halinach. Naprykład, zakony ab kanfidencyjalnaści i ahulnaje pałažeńnie ab abaronie źviestak, pryniatych u ES, paspryjali stvareńniu šabłona, jaki paśla pačali pierajmać inšyja krainy, u tym liku niekatoryja štaty ZŠA.

Adnak niekatoryja ekśpierty pierakananyja, što takim zakonam ES mocna naškodzić svaim technałahičnym kampanijam.

«Raźvićcio štučnaha intelektu ŭ ES stanie darahim abo technałahična niemahčymym, — adznačaje Biendžamin Miuler, analityk Centra inavacyj u halinie źviestak. — ZŠA i Kitaj buduć ź cikavaściu nazirać, jak ES stavić na kaleni ŭłasnyja startapy».

Ale mohuć spatrebicca hady, pakul prapanova stanie zakonam, bo zakonaprajekt pavinny ŭchvalić Jeŭrapiejski saviet, jaki składajecca z 27 nacyjanalnych uradaŭ błoka, i Jeŭrapiejski parłamient.

• 0
• 0
• 0
• 0
• 0
• 0
• 0
• 0