Zhodna z novymi danymi, 745 tysiač čałaviek pamierła va ŭsim śviecie ŭ 2016 hodzie ad chvarob serca i insultaŭ, vyklikanych pierarabotkami. Takaja infarmacyja źjaviłasia ŭ sumiesnym dakładzie SAAZ i Mižnarodnaj arhanizacyi pracy.
Jak śviedčać ekśpierty, praca ŭ pamiery nie mienš za 55 hadzin na tydzień u paraŭnańni sa zvyčajnymi 35-40 hadzinami pavyšaje na 35% ryzyku insultu i na 17% — ryzyku śmierci ad chvaroby sardečna-sasudzistaj sistemy. Prykładna try čverci ad usich ludziej, pamierłych praź pierarabotki, skłali mužčyny siaredniaha vieku ci starejšyja za hety ŭzrost. Pryčym časta źviazanyja ź pierarabotkami śmierci mieli miesca praź vialiki čas paśla takoha hrafiku, časam navat praź dziesiacihodździ, papiaredžvaje VVS.
Zhodna z dakładam, sumny trend bolš za ŭsio zakranuŭ žycharoŭ Paŭdniova-Uschodniaj Azii i zachodniaj častki Cichaakijanskaha rehijonu. Pry hetym ekśpierty ličać, što pierarabotki, chutčej za ŭsio, adkaznyja za tracinu ŭsich źviazanych z pracaj chvarob. Kolkaść ludziej, što pracujuć u takim režymie, pavialičvajecca i składaje zaraz kala 9% suśvietnaha nasielnictva.
Mahčyma, što praz pandemiju kavidu, jakaja vyklikała pierachod na addalenuju pracu i ekanamičny kryzis, situacyja mahła jašče bolš pahoršycca. Pa źviestkach SAAZ, kali kraina sychodzić u łakdaŭn, kolkaść pracoŭnych hadzin pavialičvajecca ŭ siarednim na 10%.
Kamientary