Koliś hetyja vialikija partrety kłasikaŭ biełaruskaj litaratury — Kołasa, Kupały, Šamiakina dy inšych — upryhožvali Dom litaratara.
Vosiemdziesiat čatyry partrety litarataraŭ mohuć być stračanyja.
Koliś hetyja vialikija partrety kłasikaŭ biełaruskaj litaratury — Kołasa, Kupały, Šamiakina dy inšych — upryhožvali Dom litaratara. Kali ŭ 2006 hodzie apalny Sajuz biełaruskich piśmieńnikaŭ zmušany byŭ pakinuć budynak, jaho majomaść pieravieźli ŭ Dom tvorčaści «Isłač», što ŭ Vałožynskim rajonie.
Budynak znachodzicca ŭ avaryjnym stanie, jaho nieadnarazova zalivała. I, jak vynik, karciny i knihi, što zachoŭvalisia ŭ sutareńniach, vymakli dy pakrylisia ćvillu.
«Takich, jakija b byli zusim nie paškodžanyja, niama», — kaža zachavalnica fondaŭ Lidskaha historyka‑mastackaha muzieja Valancina Chacianovič. U Lidu majomaść SBP trapiła ŭ minułuju piatnicu. Były Dom tvorčaści piśmieńnikaŭ «Isłač» kupiła TAA «Bielintechbud», i novy haspadar zapatrabavaŭ, kab piśmieńniki zabrali svaje rečy.
Kali b nie hetaja akaličnaść, karciny i knihi praciahvali b hniści ŭ sutarenńniach «Isłačy». Jak kaža kiraŭnik Sajuza biełaruskich piśmieńnikaŭ Aleś Paškievič, knihi i karciny nie vyvozili, bo «da apošniaha čakali vyrašeńnia pytańnia z Domam tvorčaści: zastaniecca jon va ŭłasnaści arhanizacyi ci nie».
A paśla jašče amal hod vyvozić «nie było kudy».
Tolki kali novy haspadar paabiacaŭ vykinuć majomaść SBP na śmietnik, mahčymaść znajšłasia. U Lidzie stvarajecca muziej «Lidčyna litaraturnaja». Praca pa jaho stvareńni viadziecca pry ŭdziele Lidskaha historyka‑mastackaha muzieja, tudy i advieźli časova partrety piśmieńnikaŭ.
Knihi z «Isłačy», a heta bolš za 2000 asobnikaŭ, pakul pieradali ŭ redakcyju haziety «Naša Słova».
U lidskim muziei niama svajho mastaka‑restaŭratara. Kab vyratavać partrety, treba šukać śpiecyjalistaŭ u Hrodnie ci Minsku. «Ja za toje, kab adkinuć ubok pytańnie chto vinavaty, — kaža stvaralnik anałahičnaha pryvatnaha muzieja ŭ Starych Darohach Anatol Bieły. — Treba ratavać hetyja karciny i knihi. Kali svoječasova nie addać ich restaŭrataru, jany prosta źniknuć». Adziny vychad spadar Bieły bačyć u tym, kab źviarnucca pa dapamohu ŭ Ministerstva kultury, pry jakim pracuje restaŭracyjnaja łabaratoryja.
Kamientary