Camy vialiki art‑fiestyval u historyi Biełarusi

Z 25 žniŭnia pa 20 vieraśnia ŭ staličnym Pałacy mastactva budzie prachodzić «Dach‑9», jaki źbiare pad adnym dacham kala 150 mastakoŭ z 11 krain.

Arhanizatarami mierapryjemstva vystupajuć mastaki i pierformatary Aleś Rodzin i Źmicier Jurkievič supolna z Sajuzam mastakoŭ Biełarusi.

Jak paviedamili arhanizatary fiestyvalu 19 žniŭnia na pres‑kanfierencyi ŭ Minsku, na praciahu šaści tydniaŭ na terytoryi najbujniejšaj vystavačnaj placoŭki Biełarusi buduć suisnavać mnohija žanry i vidy mastactva: žyvapis, skulptura, fatahrafija, pierformans, litaratura, muzyka, teatr, kino, stryt‑ i videa‑art.

«Dach» pravodzicca dzieviaty raz. Jaho mastackija akcyi prachodzili ŭ Minsku i Bierlinie ŭ asnoŭnym z udziełam biełaruskich i niamieckich aŭtaraŭ.

Centralnaje miesca na fiestyvali zojmie art‑prajekt «Achviary mastactva».

Aŭtarami kancepcyi taksama źjaŭlajucca Rodzin i Jurkievič. Upieršyniu prajekt byŭ prademanstravany viasnoj-letam 2008 hoda ŭ Centry sučasnaha mastactva «Tachieles» u Bierlinie.

Achviarami, na dumku aŭtaraŭ prajekta, stanoviacca mastaki, muzykanty, paety i ŭsie, chto staŭ na šlach tvorčaści. Pry hetym, adznačyli Rodzin i Jurkievič, achviara ŭ hetym vypadku — paniaćcie šyrokaje: «fiłasofskaje, šmataśpiektnaje, šmatčasavaje».

«Usie vialikija mastaki čymści achviarujuć, — skazaŭ Rodzin. — Za kožnym tvorčym uźlotam toicca vielizarnaja rabota. Van Hoh byŭ nastolki emacyjanalna zaražanym, što adrezaŭ sabie vucha, Šuman źviazvaŭ palcy, kab jany byli bolš płastyčnymi…»

Mastactvaznaŭca i art‑dyrektar halerei «Brama» Łarysa Finkielštejn adznačyła, što «Dach‑9» źjaŭlajecca «samym ruchomym prajektam» u jaje žyćci. Štotydniova na fiestyvali budzie mianiacca ekspazicyja płastyčnych mastactvaŭ (žyvapis, fatahrafija i skulptura), štodzionna buduć pravodzicca kancerty, vystupleńni pierformieraŭ i teatralnych trup.

Pavodle słoŭ Alesia Rodzina, 80% prahramy fiestyvalu stvaryŭ Źmicier Jurkievič. Dziakujučy jamu vyznačyŭsia śpis muzykantaŭ, jakija vystupiać na mierapryjemstvie. Siarod ich takija viadomyja kalektyvy, jak «Kniaź Myškin», «Džambibum», «Harotnica», «Racyjanalnaja Dyjeta», «SoncaKvietki», «Hurzuf» i inšyja.

Svaje akcyi ŭ ramkach fiestyvalu pradstavić supolnaść IN‑Touch. Pierformansy na «DACHu» naładziać «DSP dy Ch» («Dziaržaŭnaja supołka pierformansu dy chappininhu») «Miechaniery kultury», «Teatr psichičnaj nieŭraŭnavažanaści», «Śpiecbryhada», Mieredys Nadler, Dźmitryj Barysievič, Dźmitryj Tarasaŭ i inšyja. Siarod teatraŭ, jakija vystupiać na fiestyvali, — «InŽest», «Kabare Matyldy Štor», «CUD», «Svabodny teatr» z Bresta.

Pavodle słoŭ paeta i adnaho sa stvaralnikaŭ vydaviectva «Halijafy» Źmitra Višniova, vydaviectva płanuje pravieści na fiestyvali šeść litaraturnych mierapryjemstvaŭ i pradstavić dzieviać novych knih.

Uvachod na fiestyval z 11.00 da 17.00 budzie płatnym (4 tys. rubloŭ), paśla 17.00 i da zakryćcia — volnym.

Adela Dubaviec, BiełaPAN.

• 0
• 0
• 0
• 0
• 0
• 0
• 0
• 0