Spravu Uładzimira Mackieviča pieradali ŭ sud. Siarod inšaha jaho abvinavačvajuć i ŭ kiravańni ekstremisckim farmavańniem
Prakuratura horada Minska nakiravała ŭ Minski haradski sud kryminalnuju spravu ŭ dačynieńni da Uładzimira Mackieviča. Fiłosafa abvinavačvajuć pa troch artykułach Kryminalnaha kodeksa.
Prakuratura Minska paviedamlaje, što Uładzimir Mackievič 25 kastryčnika 2020 hoda (Marš narodnaha ŭltymatumu) braŭ «aktyŭny ŭdzieł u hrupavych dziejańniach, jakija hruba parušajuć hramadski paradak i spałučanych ź vidavočnym niepadparadkavańniem zakonnym patrabavańniam pradstaŭnikoŭ ułady, što paciahnuła parušeńnie pracy transpartu i pradpryjemstvaŭ» (č. 1 art. 342).
Taksama fiłosafa abvinavačvajuć, što sa žniŭnia 2020 hoda pa 4 žniŭnia 2021 hoda jon stvaryŭ i kiravaŭ ekstremisckim farmavańniem. U pryvatnaści, pavodle prakuratury:
— vyrablaŭ i raźmiaščaŭ u telehram-kanałach, na staroncy ŭ Fejsbuku i płatformie «Schod» materyjały, jakija «ŭtrymlivali zahadzia iłžyvyja źviestki ab palityčnym, ekanamičnym, sacyjalnym, vajennym, mižnarodnym stanoviščy Respubliki Biełaruś, a taksama niehatyŭnuju acenku pradstaŭnikoŭ ułady ŭ suviazi z vykanańniem imi słužbovych abaviazkaŭ»;
— arhanizoŭvaŭ dziejnaść pa płanavańni, padrychtoŭcy i ździajśnieńni dziejańniaŭ ekstremisckaha charaktaru členami farmavańnia i inšymi asobami;
— maderavaŭ nazvanyja resursy, kantralavaŭ ich infarmacyjnaje napaŭnieńnie ekstremisckimi materyjałami.
Taksama prakuratura paviedamlaje, što jon stvaryŭ i 7 maja 2021 hoda raźmiaściŭ na YouTube-kanale videazapis z abrazaj na adras Łukašenki (č. 1 art. 368 Kryminalnaha kodeksa Respubliki Biełaruś).
Uładzimir Mackievič byŭ zatrymany 4 žniŭnia 2021 hoda. U lutym 2022 hoda jon niekalki dzion trymaŭ haładoŭku, patrabujučy nakiravańnia spravy ŭ sud (tady havorka viałasia tolki pra artykuł 342) i źmienu miery ŭtrymańnia.
Kamientary